Aase Rise Ringstad dreiv blomsterbutikk og starta gravferdsbyrå i Ulstein. Ho var såleis med på å gjere kommunesenteret til ein meir komplett stad å bu.
Aase er fødd i Hareid. Ho gifte seg med Ola Henrik Ringstad, og dei fekk tre born. Grunnlaget for Ringstad Blomster og Gravferdsbyrå starta alt då Henriette Ringstad (bestemor til Ola H.) starta kransebinding på Hofset, og svigerdottera Hansine Ringstad tok opp tradisjonen og starta blomsterbutikk. Aase kom inn i bedrifta tidleg på 1970-talet. Butikken tilbaud då blomster, krukker, kransebinding og dekorering. Sidan flytta butikken til Skeidehus i tre år før han i 1981 flytte dit han er i dag i Bjørndalsvegen.
Aase tok handelsbrev som privatist. Då ho starta gravferdsbyrå, måtte ho ta kurs i drift av gravferdsbyrå for å kunne verte medlem av Begravelsesbyråforeininga. Ho tok også fagkurs i blomsterdekorering. Alt dette gjorde at ho hadde høve til å ta inn lærlingar. På det meste var sju personar tilsette i bedrifta på heiltid eller deltid.
Etter kvart fekk bedrifta gravferdsbil, og sjåfør var Olaf Ringstad (onkel til Ola H.). Gravferdsbyrået tok også på seg å arrangere minnestund eller syning om det var ønskjeleg. Slik er det også i dag. Aase slutta i bedrifta i 1998/99.
Aase var i fleire tiår aktiv i sjømannsforeininga Havduen.
Når du leier eit gravferdsbyrå, kjem du tett på folk. Aktivitetar som gravferdsbyrået kunne gjere for folk: levere kiste, stelle lik, ordne med annonsar, få trykt opp songar, avtale med organist og prest og kyrkjeverjekontor, pynte i kyrkja, ordne med personar til t.d. solosong eller musikk. Og sjølvsagt transport innan kommunen, frå nabokommunar og andre stader i landet. Transport av døde frå utlandet var også eit av tilboda.
