Kolbjørn Moldskred kunne sjå attende på 40 år som eigar av busselskap, sjåfør og føregangsmann for trafikkutviklinga på Hareidlandet. Han vart kalla Kollen, og bussane han åtte, vart kalla Kollenbussane.
Framgangen han gjorde, skreiv seg frå hans evne til å satse på nytt materiell til rett tid.
Kolbjørn var gift med Anne Marie Ulfstein og fekk tre born: Inger Grete, Arve og Tove.
Det var far til Kolbjørn, Andreas Moldskred, som la grunnen for arbeidet som sonen vidareutvikla. Bakgrunnen var at faren i 1922 hadde kjøpt personbil som vart nytta når vegane var berre. Når snøen kom, var hesten sikraste framkomstmiddelet, for det var ikkje brøytte vegar på øya vår før vinteren 1930 og 1931.
1. mars 1934 blei Moldskred Rutebilar skipa. Bilparken då var ein 18-setar Willy Overland og ein 7-setar Buick, nok til å stette trafikkbehovet til dagleg. I 1926 tok Kolbjørn sertifikat, og i 1931 kjøpte han sin første bil.
I 1968 bygde Kolbjørn eit garasjeanlegg ved Sauneselva, Brattøra med plass til 10 bussar utanom vaskehall og verkstad, der ein fekk plass til fire bussar. I 1972 vart det reist eit bygg attåt i to etasjar med kontorlokale i første og husvære i andre høgda.Ved Sauneselva reiste Kolbjørn verkstad og smørjehall, samt administrasjonsbygg og bustad.
Kolbjørn var med i skipinga av Samtrafikk A/S, eit selskap han leia i fleire år, og i ruteselskapet Torulf A/L der han var styremedlem.
