Torbjørn Måseide har vore helsesjef og kommuneoverlege i Ulstein. Han har gjort ein brei innsats i Hødd og vore ein pioner med omsyn til idrettsmedisin i Noreg.
Torbjørn er fødd i Søvika. Familien flytte til Ålesund då han var seks. Han var ferdig utdanna lege i 1964, og frå 1968 til 74 var han distriktslege i Sande. Han har alltid vore oppteken av idrett. Som student trente han med Tjalve og oppnådde fine 11.0 på 100 meter og ein 4. plass i junior-NM.
Torbjørn byrja som lege i Ulstein i 1974. Frå 1984 og fram til han fylte 70 sat han som helsesjef og kommuneoverlege i Ulstein. Fastlege var han heilt til 2012.
I 1975 starta Torbjørn som trenar i friidrettsgruppa i Hødd. I løpet av ein gullalderprega 10-årsperiode var han med på å få fram ei rekke talent, noko som kulminerte med junior-NM-gull på 4X400 meter stafett. Han har også vore leiar i trimgruppa, der han lanserte ideen om fjelltrim, sette opp registreringsboksar og fekk mange til å gå på fjellet.
Alt på slutten av 1960-talet vart Torbjørn «hekta» på idrettsmedisin. Han kom i kontakt med A-lagsmiljøet til Hødd alt i 1967. Testar på høddspelarane avslørte at dei var mellom dei mest kondisjonssterke i norsk toppfotball. Hødd scora ofte avgjerande mål mot slutten av kampane. Torbjørn fungerte som lege for Hødd fram til 1992/93. Han har skrive fleire idrettsmedisinske artiklar i ulike tidsskrift.
