Sverre Olav Lynge var den første skuleinspektøren i Ulstein. Han var ordførar nokre vanskelege mellomkrigsår. Han leiar i forstandarskapen i Ulstein Sparebank frå 1927 og i 37 år. Han åtte den første bilen på Flø.
Sverre voks opp på Flø. Faren styrte skulen i bygda. Sverre gjekk lærarskule i Volda. I 1917 kom han tilbake til Ulstein og vart lærar i Haddal. Seinare vart han lærar i den nystarta framhaldsskulen i Ulstein, med undervisningsrom i Fredheim, klasserom i småsalen og med utstyr til turn i storsalen. Sverre sjølv var suveren i ringane, ribbeveggen og over kassa. I 1922 fekk han skulepost på Flø og tok over farsgarden. I 1929 gifte han seg med Borghild Brubakk.
Sverre vart vald inn i heradsstyret i 1923; varaordførar same året. I 1929 vart han ordførar (til 1931). Kommunen hadde drege på seg stor gjeld, særleg på grunn av elverket. I hans første ordførarår måtte han klubbe gjennom vedtaket om å be departementet setje kommunen under administrasjon; Ulstein var konkurs. Samtidig var han godt i gang med arbeidet sitt i Ulstein Sparebank. Der og var utfordringane mange. Det var ei tid med store barneflokkar og svært tronge tider. Mange familiar overlevde på poteter, sild og graut.
Frå 1947 til 1960 var han skuleinspektør, ei tid med omveltingar: obligatorisk framhaldsskule, kommunal realskule, nye skulebygg.
Sverre dirigerte Flø blandakor, han var svært litterært interessert og ein mykje brukt talar, ikkje minst 17. mai.
Sverre vart og sett på prøve som lærar under krigen. Lærarfronten, som kona og han var med i, var den første store åndskampen med liv og helse som innsats på fleire hundre år.
