Kjersti Kleven er dotter til John Kleven (d. 2009). Ho er styreleiar i Kleven Maritime AS, har teke imot prisar og markert seg i offentleg debatt.
Ho er medeigar i John Kleven AS og dermed medeigar i Kleven. Kjersti er utdanna cand.polit. frå UiO. Tidlegare har ho vore prosjektsjef ved Nordvest Forum AS i fem år og personalsjef i Rolls-Royce Marine AS. Ho har også vore forskar ved Fafo.
Kjersti har fleire styreverv i Kleven Maritime, ho har vore styremedlem i Telenor og er nyvald styreleiar i Ekornes. I mai 2013 vart ho vald til ny styreleiar for Norsk Industri. Også i denne posisjonen har ho markert seg. Under Signalkonferansen 2014 i Oslo fekk Kjersti Innovasjon Norges heiderspris, «Årets verdiskapar». «Årets verdiskapar er visjonær, handlekraftig, har stort nettverk, og har bygt opp store økonomiske verdiar for bedrifta si», sa næringsminister Monica Mæland ved prisutdelinga.
I 2000 kjøpte Kleven-familien Kleven Verft tilbake frå Kværner. Sidan har Kjersti saman med dyktige leiarar, fagarbeidarar og ingeniørar klart å gjere verftet lønnsamt. Delar av produksjonen som var flagga ut, er tekne tilbake, og Kleven har investert mykje i opprusting av Kleven Verft og Myklebust verft i Gursken. Automatisering og effektive produksjonslinjer er ein viktig del av dette.
Kjersti har brei erfaring frå frivillige organisasjonar og sat ein periode som leiar i Landsrådet for Norges barne- og ungdomsorganisasjonar.
