Sigvald Håkonsholm var ein gründer, og var rask med å ta i bruk mykje av det nye som kom. Han starta den første båtslippen i Ulstein. Sigvald var fødd på Borgarøya.
1862 kjøpte familien Håkonsholmen og slo seg ned der. Foreldra dreiv gardsbruk og åtte eit fargeri og ein åttring til fiskebåt. Holmen med Holmesundet var ei god hamn. Under silde- og torskefisket kunne der ligge 40 båtar fortøydde der.
Sigvald reiste til Ålesund i smedlære i 1882 (23). Same året døydde både faren og mora, og han fekk ansvaret for 10 foreldrelause sysken. Han tok over Holmen, gifte seg med Ingeborg Håheim (1886) og dei fekk fem born. Han dreiv fiske og skaffa seg dekksbåt.
I 1889 sette han opp smie og kjøpte seg smedutstyr. Smia er den same som står på vestsida av sjøbua no. Han tok mellom anna på seg jobbar med å klargjere båtar.
Sigvald laga til slippen sin i 1905. Det var midt i blinken å kunne ta båtane på land. I åra frå 1910 og utover dreiv Sigvald og sonen Ole ei nokså bra monteringsverksemd. Dekksbåtane i første tida var ikkje så store. Dei var frå 30 til 45 fot. Mange nybygde båtar med eigarar frå Herøy og Sande, ja, heilt frå Standlandet, vart henta til slippen på Håkonsholmen for ferdigstilling. Sigvald sette inn motoren. I den første tida hadde ikkje slippen motor å drage opp båtane med. Seinare vart ein 4 hk Møllerup motor montert for å drage spelet.
I 1894 kjøpte han ny dekksbåt saman med ein kjenning, «Nord». Han vart seld nokre år seinare, og «St. Olaf» var klar for fiske i 1902. Sigvald hadde alt fått agentur på Møllerup-motoren. St. Olaf vart brukt i tre år med årar og segl før ein 8 hk Møllerup vart innsett i 1905.
