Severin kom frå Hop ved Bergen. Severin var den første organisten i Ulstein, men det var først og fremst som skulemann og folkehøgskulelærar han skulle gjere si gjerning.
Severin kom som reisesekretær i Ungdomskrinsen før han tok til som førstelærar ved Sunnmøre Ungdomsskule ved oppstarten 15. oktober 1908. Det første skuleåret var undervisninga halde i Ulsteinvik bedehus og i kjellaren til familiane Olaus Alme og Johan Osnes. 26. april 1909 vart huset til Ulstein kr. ungdomslag, Fredheim, vigsla. Der fekk skulen gode og tenlege rom.
I 1911 hadde amtstinget kravt at skulen måtte flytte til Borgund for å få tilskot. Møre Ungdomsskule vart reist i Borgund med stønad frå indremisjonsforeningane, og flytta i 1914.
Ungdomskrinsen, med stønad frå Ulstein kommune, heldt fram med skulen i Ulsteinvik, og Severin Hop tok over som styrar. Skulen var lokalisert i Fredheim til januar 1919, då “Lidarheim”, heimen under lia, stod ferdig. Han var bygd av to gamle hotell, frå Røldal og Oppheim på Vossestrand, med tilpasningar.
Hop var ein myndig og dugande styrar til han slutta i 1941. Severin blei 87 år gamal og kona Andrea blei heile 103 år.
Hop var sentral då skulen blei bygd. Han skulle på eit pedagogisk møte i Oslo, og reiste Vestlandet for å få seg ein ferietur. Framkomstmiddel var ein sykkel. Det var først på denne reisa at han blei klar over at dei to aktuelle hotella som seinare blei til Sunnmøre Ungdomskule var til sals.
