Leiv Havåg er kjend både som talar, diktformidlar og forkynnar. Ei tid vart han kalla «erkekateketen». I 1983 vart han vald til den første leiaren i det nye bispedømmerådet.
Leiv Havåg er fødd og oppvaksen i Havågane den tida Eiksund låg under Herøy kommune. Han bur i Eiksund den dag i dag. Han gifte seg med Hallbjørg Bigset i 1953. Dei har fem born. Leiv har eit samansett yrkesliv bak seg, frå småbrukar og bygningsmann til ungdomssekretær i Sunnmøre krins av NKUF.
Ikkje minst er Leiv Havåg kjend og skatta på tallause scener, talarstolar og preikestolar opp gjennom åra. Han høyrer til den generasjonen diktlesarar som kan dikta utanboks. Det seiest at han har kring 400 på repertoaret. Å framføre dikt på denne måten krev både innleving og formidlingsevne.
Det krev og at du har god kjennskap til diktverda. Han har gjerne kombinert diktlesinga med kåseri om eit tema eller ein diktar, til dømes Jakob Sande eller Wergeland. Dei siste åra har han gjort eit stort arbeid med å presentere norske dikt og diktarar i spalta «Laurdagsdiktet i Vikebladet. Han har elles ofte engasjert seg med lesarinnlegg i same avis.
Leiv har gitt ut eit par bøker. Ei av dei, «Gledebodet» (2012), er ei lita preikesamling. Han har og gitt ut «Livet og minna», ein sjølvbiografi.
Havåg tok kristendomsstudium i vaksen alder ved DH i Volda, var kyrkjelydssekretær i Sande, kateket i Ulstein og sist undervisningsleiar i Møre bispedømme (1985-93). Seinare reiste han ein periode for IKO (Institutt for kristen oppseding), to månader om våren, to om hausten. Dei siste åra har han vore lek prestevikar på Søre Sunnmøre.
