Johan Haddal

8. Av større prydmalingsarbeid som eg har utført kan nemnast:
Grimstad Bedehus i Hareid 1916
Ulstein kyrkje i 1914
Gursken kapell i 1920
Bjørke kapell 1920
Indre Herøy kyrkje 1921
Aukra kyrkje 1926.

Nokre ungdomshus og ei mengd private hus har eg mala i alle desse åra. Allereie den tida eg var i Oslo tok eg til å studere norsk rosemaling og det har eg fortsett med utigjennom åra, og det er ikkje so reint lite av denslags arbeid eg har utført her på Sunnmøre.

Forutan vanleg handverksmaling har eg også sysla litt med biletmaling (i akvarell og olje). I Oslo hadde eg ein gong eit par akvarellar på dei «unges» utstilling og no i seinare tid hadde eg eit par malarstykkje på Vestlands­utstillinga. I 1918 tok eg til med å samle folkeminne i bygdene der eg var på malararbeid og noko av det eg har samla har vore prenta i tidsskriftet «Sunnmøre Historiske lag» Har også samla på stoff til ei bygdebok – gards og personhistorie.
Noko av dette har vore prenta i bygdebladet «Aarvak» Ulsteinvik og i «Vikebladet» same stad.

9. Har alltid vore norskmålsmann og var den første som tinga «målblad» i Ulstein prestegjeld. «Vestmannen» det vesle lokalbladet som Rasmus Steinsvik gav ut i Volda ikring 1886

10. Ved avslutninga av målararbeidet i Ulstein kyrkje i 1914 var det ein artikkel i Sunnmørsposten om arbeidet mitt der og no i 1943 var der skrive noko om meg i Sunnmørsposten. Elles kan det vel hende at namnet mitt har vare nemnt i andre blad også.

11. Redaksjonssekretær Olav Hatlemark i Sunnmørsposten, som er min skulekamerat frå folkeskulen, er vel den som har best kjennskap til meg og mitt. Johan Haddal
Hareid, 28. november 1943.

Om Johan Haddal skriv Asle Geir Widnes Johannesen dette om han i boka “Hundre år – hundre personar i Ulstein”:

Johan Haddal var prydmålar av yrke og utførte mange dekorasjonsarbeid i regionen. Han har mellom anna måla taket, dørene og gallerifronten i Ulstein kyrkje.

Han vart fødd på gard i Haddal, men gifte seg aldri. Han arbeidde på farsgarden til han var 20 og rodde vinterfiske. Hausten 1889 reiste han til Oslo og gjekk eit kurs på kunst- og handverksskulen. Då kurset var slutt, vart han læregut, seinare svein, hos dekorasjonsmålar Wilhelm Krogh i Oslo til sommaren 1899. Vinterkveldane gjekk han heile tida på kunst- og handverksskulen. Han var med på fleire større arbeid, som frimurarlogen, Nasjonalteateret og Grand Hotel. I 1900 arbeidde han ved den norske avdelinga på verdsutstillinga i Paris. Etter nokre månader hamna han i Berlin der han arbeidde med ymse målarmeistrar til 1902. Fram mot jul dette året kom han heim til Sunnmøre og arbeidde der sidan.

Av større prydmålingsarbeid han utførte var Grimstad Bedehus i Hareid (1916), Ulstein kyrkje (1914), Gursken kapell (1920), Bjørke kapell (1920), Indre Herøy kyrkje (1921) og Aukra kyrkje 1926. i tillegg har han måla nokre ungdomshus og ei mengd private hus opp gjennom åra. Han sysla og litt med biletmåling i akvarell og olje. Eit par av måleria var med på Vestlandsutstillinga.

Johan Haddal samla og folkeminne, og noko av det vart prenta i tidsskriftet til Sunnmøre Historielag. Han hadde og artiklar på trykk i bygdeblada Aarvak og Vikebladet.