Bjarne Wærdahl har vore ein markant og kjend person i lokalsamfunnet med mange gjeremål og mange ballar i lufta både næringsmessig, kulturelt og innan fotball.
Bjarne kom til Ulsteinvik i 1984 etter journalistutdanning, arbeid i NRK, og til saman fem års teneste som offiser i FN, NATO og Sjøforsvaret. Han arbeidde fram til 1996 som informasjonssjef og Head of Corporate Marketing i Ulsteinkonsernet og leia eit pionerarbeid med profilering av Ulstein til å bli eit kjent varemerke verda over.
I 1996 starta han ”Offshore Support Journal”, som i dag er eit internasjonalt leiande tidsskrift innan offshoreskip. Seinare kjøpte han opp fleire større internasjonale shippingtidsskrift gjennom selskapet Riviera Maritime Media Ltd, i London og bygde opp fleire større verdsomspennande fagkonferansar. Samtidig arbeidde han med profilering, merkevarebygging og internasjonal marknadsføring for fleire industrikonsern på Sunnmøre.
Frå 1998 var han stiftar og eigar av ei rad verksemder i regionen, mellom dei tre møbelvarehus. I 1999 etablerte han ”Regionavisa”, ei gratisavis for Søre Sunnmøre og Nordfjord, med eit opplag på 30.000. Så starta han selskap i Portugal for utvikling av kulturelle relasjonar mellom Portugal og Noreg. Eit resultat av dette er ”Fadofestivalen”, ei portugisisk kulturveke i Ulsteinvik. Bjarne har teke imot fleire utmerkingar i Portugal for dette arbeidet. Han har sete fleire periodar som vara i kommunestyret og på fylkestinget.
I lokalmiljøet og i fotballkretsar er Bjarne også kjend som speaker på Høddvoll i over 30 år.
