Lillebøverkstaden i Ulsteinvik

I Lillebøverkstaden blei det laga møblar til hus og heim, som spisebord med stolar, bokreolar, dekketøyskap, skjenk med skuffer til m.a. bestikk, dukar mm. Så var det sofa -eller divan, lenestolar, salongbord, soverommøblement lampar mm. Alt blei utført med sirleg presisjon. Dei hadde og samarbeid med andre handverkarar til enkelte oppgåver, som t.d.treskjering som dekorinnslag.

Fleire kan vel hugse korleis det var å kome inn døra til Lillebøverkstaden. Ei nydeleg lukt – tre, spon, lim og lakk i skjønn forening. Materiallager i første etasje i tillegg til store bandsager, bandpussemaskiner og fres. For å kome opp i andre etasje måtte ein gå på den bratte slitte trappa med litt høge trinn (eller var det eg som var så lita?). Her blei treplank limt ihop til større og tjukkere flater, som igjen skulle høvlast og pussast, og til slutt lakkast eller malast.

Slik eg har fått det fortalt, var Lillebøverkstaden også ein kjekk møteplass for mange av karane som ville vite nytt, eller «røle» litt – som dei sa.

Reparasjonar var og ein del av arbeidsoppgåvene her. Kvar vinter fekk dei jobben med å spjelke saman knekte ski.Mang ein uheldig skiløpar har fått fiksa skia si her, sjølvsagt med «fingerskøyting».

Som eldste barnebarn av 12, fekk eg gleda av å få kome inn på «verkstedet» og sjå litt av det dei gjorde. Eg var også heldig å få både ski og lite bord med stolar til. Det siste har eg framleis, så no er det barnebarna som har gleda av det.

Johannes med eit av borna.

Huset Johannes bygde ligg framleis opp i bakkane ovanfor Reiten. Johannes var ein godlynt og omgjengeleg mann, godt likt av alle. Ikkje minst som ektemann, far og bestefar. Han var veldig glad i familien sin,og gjorde alt for at dei skulle ha det godt. Han var også med i Ulstein mannskor. Øvingskveldane kan eg hugse at han fiffa seg ekstra og spela igjennom korstemma si på orgelet før han drog.

Desverre døde Johannes av hjartesvikt berre 65 år gamal. Eit stort sakn for alle som kjende han, men sjølvsagt mest for Agnes og familien.

Eit lite utval av arbeid som blei utført ved Lillebøverkstaden