Laluna Platebar

Eit viktig konsept for Laluna Platebar var direkteimport av plater og kassettar frå England slik at kunden kunne få musikk til rimelegare pris. “Endelig!! Nå kan De kjøpe plater til priser de liker”, stod det i opningsannonsa i lokalavisa. Og to dagar seinare i same avis blei det annonsert: “Noe har skjedd! En platebar er åpnet.” På opningsdagen var hyllene halvfylte med plater grunna flystreik i London, men veka etter kunne Laluna annonsere: “Kassetter ankommet!”

Det var først tidleg på 1900-talet at lydplater blei populært blant folk. I 1877 hadde amerikanaren Thomas A Edison gjort det mogleg med sin fonograf å spele av lyd. Ti år seinare tok Emilie Berliner patent på grammofonplate.

Dei første LP-ane kom på marknaden i 1948 og blei fort populære. LP eller langspelplate (etter engelsk Long playing) er støypt i vinyl. I 1977 og ved oppstarten av Laluna Platebar var det kun mogleg å kjøpe vinylplater og kassettar. CD-plata kom tre år seinare i 1980.

Svenning Vang uttalte i oppstartsåret at salet av plater og kassettar er “så å seie jevnt”.

Evig kjærleik

Det var ingen tvil om at Laluna var ein døropnar for mange for ny musikk og nye sjangrar. I platebaren blei ein evig kjærleik til ulike artistar og grupper skapt. Her var det første gong ungdom i Ulstein fekk høyre gitarspelet til Roger Waters i Pink Floyd eller blei slått av gladartisten Jahn Teigen som snudde 0-poeng i Melodi Grand Prix til ein platesuksess med plata “This Year’s Loser”.

For eigarane var det viktig å unngå kjøpepress for kundane. Det skulle vere lov å kome innom og lytte til musikk og bli inspirert til å like musikk. Ulsteinvikaren Ole Inge Molvær kallar seg sjølv “nerdete” og veldig oppteken av kva studiomusikarar som er med på platene. Dette visste Jorunn – Jorunn var kunnskapsrik, flink og hjelpsam og fann fram musikk som eg var interessert i. Sjølv minnast Jorunn det gode miljøet med alle positive personane som kom innom Laluna.

– Eg oppdaga Al Jarreau rundt 1980, på platebaren LaLuna i Ulsteinvik. Der dreiv dei ei strålande plateforretning med tung vekt på jazzfunkpop, og amerikansk funk hadde ei høg stjerne blant kundane, skriv Gunda Djupvik frå Leikong i sin blogg.

Når det gjaldt musikkutvalet sa Grønmyr og Vang til lokalavisa Vikebladet at ein vil prøve å satse på dei beste innspelingane, dei beste orkestera og musikkutvalet vil spenne over alt frå klassisk, via jazz og til popmusikk.

I 1978 endra Laluna namnet til Laluna plate & kasettbar.

Laluna blei starta opp som eit enkeltmannsforetak. Namnet kom Jorunn på etter eit hotell ho budde på utanfor Barcelona på si første utanlandsferie saman med venninner. Hotellet og opphaldet var så fantastisk at ho valte å kalle opp igjen forretninga etter hotell Laluna.

Den første logoen laga Svenning. – Vi kom rett frå Vatles Handelsskole Voss der vi hadde design som fag, seier Jorunn.

To og ein halv månad etter opninga vert Svenning Vang intervjua av lokalavisa. Han slo fast at dei fleste musikkjøparane i Ulstein er tenåringar, og at dei stort sett kjøper popmusikk. Særleg countryrock og pop. I hovudsak blir det stort sett musikk av artistar frå England og USA. Norsk musikk blir selt “inn i mellom”. Eagles, Smokie, Dr. Hook og den nederlandske gruppa Pussycats sel best.

Annonsering i Vikebladet med populære artistar slik som bl.a BoneyM blei utover hausten 1978 meir og meir vanleg. Faksimile: Vikebladet.

Jorunn melder at Litle Feet og Steely Dan er dei mest populære utanlandske artistane. Alex og New Jordal Swingers er mestseljande av norske artistar. Få kjøper klassisk musikk og nokre kjøper jazz slik som bl.a Terje Rypdal og Jan Garbarek. Ved sida av klassisk musikk sel platebaren lite av viser og religiøs musikk. Laluna kom med på Beat-lista pga av det gode salet. Det var normalt berre plateforretningar i Oslo, Bergen og Trondheim som nådde opp til å kome med på Beat-lista.

Laluna brukte ikkje den første tida store ressursar på å annonsere i avisa. Annonseringa var jungeltelegraf. Etter opningsannonsene var det få eller ingen annonse i skipingsåret. Både Radioservice og Loen’s musikkcenter er meir ute og annonserer i Vikebladet. Men i midten av juni 1978 er første annonse der dei annonserer for BoneyM og Rivers of Babylon. Namnet er endra til Laluna plate & kasettbar og forretninga har fått ny logo. Og no annonserer forretninga meir aktivt utover sommaren 1978 og reklamerer med at “Vi har utvalget og de laveste prisene”. Og midt i fellesferien vert det annonsert for 64 originale amerikanske hits på ei dobbel plate. At nokre plater er meir populære enn andre vitnar annonsa “På lager igjen”. Vinnaroppskrifta for å skape interesse og eit godt sal ser ut til å vere ein-spaltes annonse og ofte annonsering.

Hausten 1978 vert det annonsert konsert med Jonas Fjeld Band på Ulstein Samfunnshus. Førehandsbillett var mogleg å kjøpe på Laluna. Musikklivet på Sunnmøre hadde rundt 1980 teke seg opp med nasjonale og internasjonale artistar. Her fann konsertarrangørar og platebarar saman i eit positiv samspel.

Jorunn opplevde det spennande å bli kjent med dei som arbeidde hos dei store plateselskapa og konsertarrangørane i Oslo. Sal av plater og konsertbillettar var god forretning. – Men eg blei ikkje rik på å drive Laluna. I alle fall ikkje på pengar. Men eg blei rik på å møte mange flotte menneske.

Vikebladet kunne melde at Jonas Fjeld samla 250 tilhøyrarar, og konserten blei ein stor suksess. Det gode samspelet mellom arrangør og platebar toppa seg hausten 1986 då Sissel Kyrkjebø kom for å signere plate hos Laluna Platebar. Då hadde butikken flytta (1983) til andre etasje i Foreiningsbygget, det som i dag er Sjøgata 45, og det var stappfullt med folk.

Men Sissel let vente på seg. Årsaka viste seg at primus motor hos konsertarrangøren Sponders frå Ulsteinvik, Åge Grimstad, hadde drive lærekøyring på Sulesund for den unge artisten. I Vikebladet 11. november står det at Sissel Kyrkjebø sitt Ulsteinvik-besøk skapte nærast trafikkaos i sentrum då ho signerte plater hos Laluna.

Laluna opna hausten 1977, og blei lagt ned 20 år seinare i 1997. Elisebet Barsten, søster til Jorunn, tok over forretninga til Jorunn i 1983. Elisebet selde den vidare til Øyvind Osnes og Åge Grimstad 1. januar 1990 og flytta til Molde og byrja som miljøarbeider på Tøndergård i Molde. Sindre Johan Bigset tok over forretninga seinhausten i 1991. Han var ein ung forretningsdrivar i tjue-årsalderen Mange kjekke folk som hjelpte til i butikken. Andre Skotheim, tidlegare fotballspelar for Hødd, tok over Laluna hausten 1993. Han omtala tida som butikkeigar som ei kjekke tid. – Som musikkinteressert var det ekstra gøy å få jobbe med musikk. Ein fin måte å halde seg oppdatert på. Tore Liadal tok over 1. januar 1995. Tore reiste i militæret i 1996, og i 1997 blei forretninga lagt ned.

To viktigaste årsaker til at Laluna blei lagt ned var nok pris og tilgjengelegheit. Top-40 listene kom i kioskar og bensinstasjonar. Desse utsalsplassane hadde lenger opningstider, lavare prisar, og gjorde det vanskeleg å drive spesialforretning innan musikk i vår region.

Gode minne

I dag er lydfiler det leiande mediet for musikk, anten som nedlastbare filer eller som strøyming. Utviklingea av strøymetenester heng saman med populariseringa av internett frå slutten av 1990-tallet og i byrjinga av 2000-tallet. Strøyming tok over i 2013 som den dominerande måten for kjøp og sal av musikk i Norge.

I dag ville det neppe vore mogleg å starte ei forretning som Laluna. Men det er mange av oss som minnast ei fin tid. Nyårsaftan i 2020 la Åge Grimstad ut eit innlegg på Facebook om Laluna. Åge skriv: Laluna var plassen for oss i ungdommen å kjøpe plater. Jorun visste akkurat kva slags musikk eg ville ha – og der inne i Bjørndalsvegen kjøpte eg mine aller første plater.

Mange av kommentarane viser kor viktig Laluna og Jorunn var for deira eiga interesse for musikk. – Ho visste med det same eg kom inn døra, at det var Springsteen eg såg etter, utan at eg sjølv visste at det var han eg såg etter. Ho visste det første gongen eg kom inn døra. Ein annan skriv – Vi tok bussen frå Leikong til Vik for å gå på Laluna – den kosta 3,50 kvar veg. Den fyrste eg kjøpte var Abbey Road, ikkje noko dårleg val.

Og at det var god service var det ingen tvil om – Jorun hadde peiling og Laluna var mest interessante butikken på heile Sunnmøre. Tommel opp for Jorunn og Laluna! Det forsvann nokre kroner her, ja!

Vinteren 2021 blei det stilt spørsmål på Facebook om du hugsa den første plata du kjøpte på Laluna. Langt over 100 personar engasjerte seg. Her er nokre av svara:

• Vikebladet
• Intervju med Jorunn Grønmyr
• Wikipedia
• Facebook