Kona til Møller tok imot kongeskjøtet som vart skrive 12. august 1724. me veit ikkje anna enn at ho og ervingane etter henne stelte seg slik med kyrkja og jordegodset at få hadde grunn til å klage.
Det var annleis då Christoffer Rønneberg vart eigar i 1781. Med vedlikehaldet av huset var det vel som på Hareid. Men det som arga bøndene attåt, var at dei meinte Rønneberg kravde meir i tiend enn han hadde rett til. Kring hundreårsskiftet blussa krangelen stadig opp og det kom til rettsak. Den myndige presten Buschmann såg nok at litt feil måtte det vere på begge sider, og han rådde til forlik. Striden enda med at bøndene fekk kjøpe kyrkja og jordegodset for 2400 Rdlr. i 1801.
Bøndene tok ikkje over noko slott. Dei visste det. Verdien låg i jordegodset. Lite må ha vorte gjort for å få huset i betre stand. Då Buschmann vart prost for Søre Sunnmøre året 1818, lyder visitasmeldinga hans til biskopen om hans eiga kyrkje:
«Ulfsten Kirke er ein liden og eldgammel Stenkirke, er i slett stand og altfor liden til Almuen.»
