Dei tilhogne marmorsteinane har høyrt til dør- og vindauge-opningar. Set ein mange nok saman, lagar dei ein halvrunding.
Den romanske bogen var i bruk heilt til slutten av 1100-talet. Då kom ein ny måte, det at bogane enda i ein spiss runding, den gotiske bogen. Etter dette må ein rekne med at steinkyrkja vart bygd kring 1150.
Ulstein-kyrkja var enklare enn dei andre steinkyrkjene frå same tid i Sunnmøre Fylke, kyrkjene på Åheim, Herøy, Giske og Borgund. Her er mest ikkje profilerte steiner å finne. Me reknar med at ho er bygd til «høgsæterkyrkje» for ein hovding. Han var nok ingen småkar om han ikkje bygde så «flott». Her samla han hus- og gardsfolket til messe. Var han verkeleg gripen av trua på Kvite-Krist, fekk nok andre med lenger veg å kome inn. På den måten var høgsæterkyrkja ei misjonskyrkje.
Men tidleg gjorde ho teneste som soknekyrkje til «Ulfesteins kirkiusokn.»
