Koret er penaste romet i ei kyrkje. Her ifrå lyder Guds ord, her vert truvedkjenninga sagt fram og bøner borne til Gud. I koret – ved altarringen – tek Jesu vener i mot nattverden, konfirmantar og brurfolk får si velsigning, og ved døypefonten vert borna kristna.
Sjølve altarbordet står no heilt inn til bakveggen. Fyrste altartavla var den enkle trekrossen som fylgde med frå Ulstein. Den vart i sokneprest Bjørlykke si tid gjort ære på ved å plassere han over nordre utgangsdør. Noverande altartavla er frå 1914. Herøypresten Christensen har måla biletet, ein kopi av eit kunstverk «Oppstandelen». Kring i landet skal finnast 70 slike kopi. Den dryge ramma ikring er halden i empirestil.
Å leggje på altarbordet ein kvit duk, er gammal skikk. Duken som no er i bruk, har ei bord med symbola kross og kalk. Duken er sydd og brodert av Lovise Ulstein og Olune Hasund (1959). Altaret er elles kledd med eit raudt teppe. Med til altaret høyrer at lys skal brenne under gudstenesta. Dei to lysestakane i messing er så gamle at dei truleg også har gjort teneste i steinkyrkja. Ein trearma lysestake i sylv utan noko slag inskripsjon er frå ny tid. Offerskåla i sylv er gåve frå klokkar Osvald Ulstein (1959). På bordet ligg og ein stor, fint innbunden bibel, ei gåve frå Ingolf Eikill i 1940.
Me har og andre ting til pryd på altaret ved særhøve, krystallvase og tinnstakar gjevne av P.F. Waage, keramikk-vasar og offeskål i tinn som Åshild Sivertsen har gjeve. Alt etter 1964.
Utanom altaret går altarringen. Forma er oval, og kneleskammelen er kledd i lyst skinn.
Døyptefonten står på nordsida av koret. Han er i form den vanlege typen frå førre hundreåret. Døypefatet har gjort teneste i meir enn 200 år. Det er av messing og pent i form. Det har ikkje noko slag merke. Den indre diameteren er 48 ca og djupta 5,5 cm.
Av andre ting i koret er dei to sjuarma lysestakane i smijern. Dei er teikna og laga av Konrad Simones 1960. Ulstein Husmorlag tenkte på at brurfolka skulle sitje fint og gav dei to utskorne stolane med skinn i sæte og rygg. Ser du vel etter er det symbol i utskjeringane. Ulstein Møbelfabrikk gjorde arbeidet i 1947.
