Tanken om å flytte kyrkja heldt seg levande. Det var ei uroleg tid på «kyrkjefronten» fyrst i 1870-åra. Hareid og Vartdal høyrde ikkje berre til same prestegjeld, men bygdene hadde heradstyre i lag med Ulstein. På Vartdal arbeidde dei med å få verte utskilt til eige sokn og byggje eiga kyrkja, og på Hareid strava dei verre med ei kyrkje der tårnet vaks opp gjennom, taket, og mange meinte at eit nytt bygg måtte kome på tale.
Folk i inste delen av soknet gjorde straks ein framstøyt.
I 1874 sende gardsbrukarane i Haddalbygda, på Fjelle, Garnes, og Håheim ei føreteljing til kommunestyret om at det skal virke til «at Ulfstens Kirke bliver flyttet frå Ulfsten hvor den nu står, til Ulfstenvig». I april 1875 drøfta kommunstyret dette, og det valde ein komite på 8 mann til å «tage denne Sag under Overveielse». Nokre månader seinare kom innstillinga, ei tilråding om flytting og det nokså snart. På same kommunestyret utsette dei flyttinga, for dei ville ha det økonomiske grunnlaget avgjort før meir skulle skje. Komitten hadde tilrådd å kjøpe kyrkja av eigarane og sameleis kyrkjegarden på Ulstein. Kjøpet, var gjort framlegg om, skulle dekkjast av lån og ei utlikning mellom bøndene. På same tid skulle det vere slutt på «Havre- og Kvæg-tiende». Og endeleg valde kommunestyret to mann til å førebu kjøpet.
På eit seinare møte hadde kommunestyret funn fram til å bruke pengar av oppspard kassa-opplag. Men det var for lite og søknad om eit lån på 1500 spd sende heradet i veg til Oplysningsvæsenets Fond.
8. mai 1876 vedtok heradstyret at flyttinga skulle setjast i verk i 1878. Karane i heradstyret tenkte og på ein ny utsjånad: «–saa Kirkebygningen beholder sin nuværende form med undtagelse af taarnet som nu står på midten av skibet, flyttes til kirkens venstre ende såfremt dette findes hensigtmessigt.» truleg ottast dei at tårnet ville vekse opp gjennom taket likeens som på Hareid.
