Den siste verdskrigen fekk store konsekvensar for mange, slik også for to brør frå Børselv i Finnmark og to systre frå Jørngarden på Ulstein.
I 1944 snudde krigslykka for alvor på Austfronten. Finland fekk ultimatum frå Sovjetunionen; anten okkupasjon eller fredsavtale, der ein del av fredsavtalen var at Finland skulle gå til krig mot Tyskland. I praksis ville det seie at finske og sovjetiske soldatar skulle kaste den tyske Lapplandsarmeen på 250.000 mann ut av Nord-Finland. Finland aksepterte avtalen med Sovjet. Dei tyske soldatane strøymde inn i Finnmark, som frå før hadde titusenvis av tyske soldater, og starta tilbaketrekkinga til Lyngen i Nord-Troms. Den 28. oktober 1944 gav Hitler ordre om at heile Finnmark og Nord-Troms skulle tvangsevakuerast, og at alle materielle verdiar frå Lyngen til Kirkenes skulle øydeleggast. Resultatet vart den største katastrofen under krigen i Noreg.
Av eit folketal på ca. 80.000, vart ca. 60.000 tvangsevakuerte til resten av landet, medan litt over 20.000 greidde å gøyme seg vekk og overvintre i hytter, jordgammer, steinholer m.m. Tyskarane øydela 12.000 våningshus; av desse 6000 gardsbruk, 150 skular, 500 større og mindre industribedrifter, 22.000 telegrafstolpar, 12 telefonstasjonar, 11 telegrafverkbygningar, 350 bruer, 21 medisinske institusjonar, 20 kyrkjer, 180 fyrstasjonar, 118 kraftverk, 1066 elektriske motorar, 430.000 meter luftleidning og kabel, 350 motorbåtar, 200 fiskebruk og fleire tusen robåtar. Det som skjedde i Finnmark og Nord-Troms er den største tragedien i nyare norsk historie, men den har blitt lite påakta av folk i Sør-Noreg og av norske historikarar.