Jubileumsutgåve av Levd liv

Dette var tidleg vinteren 2004/05, og boka skulle vere klar til farsdag i november. Dette har historielaget gjort til ein tradisjon, og dermed kan boka fungere som farsdagsgåve eller julegåve alt ettersom.

– Alt i starten innleidde eg eit godt samarbeid med Einar Grimstad – som redaktør. Første nummeret vart godt motteke i pressa; dei merka seg bildebruken, og at vi lyfte fram einskildpersonar frå lokalhistoria.

– Eg trur det var eit oppdemt behov for dette tiltaket. Her er mange historieinteresserte i Ulstein, kommenterer Magne Grimstad jr., som tok over redaktørjobben i Levd liv då broren Einar døde i 2011.

Velvillige forfattarar

Aksel Hauge er klar på at dei aldri hadde klart å skape Levd liv utan dei mange velvillige forfattarane rundt om i bygdene i Ulstein. For redaksjonsnemnda har det vore eit mål å få med stoff frå alle krinsane i kommunen. Stort sett har dei lykkast med det. Fleire skribentar har levert fleire artiklar opp gjennom åra. Redaksjonen har sagt at dei gjerne hjelper til med å forme stoffet skriftleg. Etter 10 år med Levd liv med gjennomsnittleg 15 artiklar i året, dreier det seg i alt om ein stad rundt 150 artiklar med lokalhistorisk stoff. I tillegg kjem ei rekke historiske bilde.

– Likevel ser vi eit stort potensial i boka. Her er mange som sit på godt lokalhistorisk stoff. For redaksjonsnemnda gjeld det å kome i kontakt med nye skribentar. Vi har sjølvsagt ikkje høve til å kontrollere alt innhaldet i artiklane, men målet er at Levd liv skal vere eit korrekt, historisk dokument, summerer Magne Grimstad.

Starten på Spor forlag

Eigentleg var Levd liv 2005 startskotet til Spor Forlag og Einar Grimstad sitt steg inn som profesjonell redaktør og forlagsmann. Forlaget starta opp 1. desember 2005 med ein tilsett, medan Einar byrja i 2006 etter å ha sagt opp jobben sin i Jets Vacuum på Hareid. Saman med Aksel Hauge leia han arbeidet med å sy saman årsskriftet i åra framover. Men så vart han sjuk, og då Einar døde i 2011, miste arbeidet ein kreativ og historieinteressert forlagsmann.

2011-utgåva var den siste Einar var med og redigerte. Han døde 5. juni, knapt 53 år gammal. I denne utgåva skreiv Aksel Hauge eit minneord over redaktøren, venen og samarbeidspartnaren. Her skreiv han mellom anna: «For oss i Ulstein Historielag er saknet stort. Forutan å vere familiemann, medmenneske, evig optimist og gledespreiar, hadde han stor arbeidskapasitet og var særs kreativ. Dette kom ikkje minst fram i arbeidet i Spor Forlag og den store bokproduksjonen hans der. For oss som i fleire år samarbeidde med han om årsskriftet Levd liv, er saknet stort. Han hadde ein lun veremåte og var særs lett å samarbeide med. Dessutan hadde han ei stor kontaktflate. Det kan trygt seiast at Levd liv har vore eit av Einars kjæraste bokprosjekt som han la ned mykje arbeid i også då han kjempa mot den nådelause sjukdommen. Det gledde han stort at Levd liv vart godt motteke av historisk interesserte lesarar. Til det siste snakka vi om årsskriftet, og han ønskte sterkt at det måtte halde fram med å kome ut.»

Dagleg leiar Magne Grimstad jr. i Osberget AS forstod med ein gong at arbeidet med Levd liv måtte førast vidare. Derfor tok han på seg redaktøransvaret og gav ut årsskriftet gjennom Osberget AS. Jubileumsboka er den fjerde utgåva Magne Grimstad jr. er redaktør for.

– Dette er noko av det finaste eg har fått vere med på. Eg har ikkje hatt den same sterke historieinteressa, men det har vore viktig for meg å føre Levd liv vidare i Einar si ånd, fortel Magne.

– Kva er den største utfordringa?

– Dei har vore ei utfordring å skape dei rette grenseoppgangane mellom eit frivillig arbeid gjennom Ulstein Historielag og ein kommersiell aktør som Osberget. Aksel har vore heilt fantastisk på dette området. Han forstår at ei bedrift må tene pengar på arbeidet sitt. Han er ein leiar som er raus med midlar i fellesskapet, sjølv om han sjølv er forsiktig som person. Historielaget har raust vore med på fleire historiske prosjekt, både bøker og film, rosar Magne, og legg til:

– Elles har det vore ei stor utfordring å samle inn alt stoffet. Det har til tider vore ein einsam og krevjande jobb å vere pådrivar, og arbeidet har kvilt på leiaren i redaksjonsnemnda.

– Det kan også vere ei utfordring når nære pårørande skal skrive om nokon av sine. Dette med å halde avstand. Det er noko vi har vore opptekne av, legg Aksel til.

Same malen

Jubileumsutgåva er laga etter same malen som dei føregåande.

– Aksel er som Nils Arne Eggen; han er i gang med neste utgåve med det same årets er send til trykkeriet, smiler Magne.

– Framover skal vi stort sett følgje den linja vi har hatt; finne skribentar som har ei lokal forteljing på hjartet. Bilda er også viktige. Det vil vi halde fast på. I tillegg har vi no bilde av forfattarane og nokre opplysningar om kvar, seier Aksel. Han vil halde fast på ein fin bokbunad, ulike fargar frå år til år og ei delt framside.

Næringslivet støttar historielaget med støtteannonsar i Levd Liv. Historielaget hentar også inn pengar frå det offentlege til enkelte prosjekt. Historielaget har ikkje andre kostnader med boka enn sjølve arbeidet som forlaget gjer. Medlemmene får kjøpt Levd liv med eit avslag på 50 kroner. I jubileumsåret har Ulstein Historielag ein sunn økonomi.