Veggene fekk tidleg eit målingsstrøk. Men fyrst i 1914 vart skipet fullmåla inne. Den gongen strekte målaren strie på veggen og måla på det. Under ei hovudvøling i 1970 kom strien bort, tømmeret vart sandblåse og trefargen kom tilbake.
Johan Haddal dreiv både som kunstmålar og rosemålar attåt det vanlege målararbeidet. Han kom fram til ein eigen stil når det gjeld rosemålingsdekorasjonane. Me ville sakne det heimslege og intime draget som ligg over Ulstein-kyrkja om dei brått kom bort. Det er neppe overdriveå seie at Haddal har greidd å finne form for kyrkjelege symbol i si rosemåling og nyttar meir slike symbol enn som elles er vanleg på våre kantar.
Under tak i skip og kor går breie bordar i rosemålarslyngar, for det meste blad. Inn i dette er fletta kristne symbol. Engel og kross er dei viktigaste og så Kristus-hovuda over sideinngangsdørene. I kvart hjørne i kortaket finn me symbola for dei fire evangelistane: Mennesket, løva, oksen og ørna, over altartavla ei due.
På ein annan måte finn ein same symbola i fronten til orgellemen. Her held dei forundelege skapningane med venger kvar sin bokrull. Ideane til desse symbola er henta frå Openber. 4,7 og Esekiel 1,10 o.f.
Dørene til sakristiet ber symbola kalken og krossen. Også preikestolen har nokre enkle motiv.
