Tore Ulstein er industrileiar og president i NHO. Han er medeigar i familieselskapet Ulsmo og dermed medeigar i Ulstein Group. Tore er utdanna sivilingeniør.
Tore har ein doktorgrad med marin hydrodynamikk som spesialfag og med diplom frå Massachusetts Institute of Technology. Tore har lang erfaring frå konsernet og har mellom anna vore administrerande direktør for Ulstein Verft AS og Ulstein Design & Solutions AS. Ulstein Group blir oppfatta som ein trendsettar innan skipsdesign, skipsbygging og elektro- og kontrollsystem og har mellom anna utvikla det revolusjonerande skrogkonseptet ULSTEIN X-BOW. Det førebels siste skotet på dette treet kom då Ulstein lanserte ULSTEIN X-STERN under oljemessa i august 2014; ei ny utforming av akterenden på skipa. Løysinga skal auke operabiliteten ved å ha positiv innverknad på dynamisk posisjonering, bølgjerespons, komfort om bord – og tryggleik under tøffe forhold.
Han held foredrag og markerer seg i den offentlege debatten både lokalt og nasjonalt, til dømes når det gjeld rammevilkår for næringslivet, forsking og utdanning. Han er også oppteken av innovasjon og vilkåra for nyskaping i t.d. i den maritime næringa i Norge.
Tore Ulstein er son til industrimannen Idar Ulstein. Han har vakse opp i Ulsteinvik saman med fire sysken. Han er styreleiar og visekonsernsjef i Ulstein Group ASA, områdeleiar i Design & Solutions AS og administrerande direktør i Ulstein International AS.
