Hødd vart skipa 1. august 1919. Første året leigde Hødd ei mark av Benjamin Osnes ute på Os-haugen (Gard nr. 7, bnr. 3 på Osnes). Men så kjøpte klubben eit areal av Martinus Molvær oppe på Støylane (Gard nr. 109, bnr. 2). Fridtjof Hofseth har fortalt korleis Hødd-karane opparbeidde den første grusbana på dugnad. Reiskapa var hakke, spett, spade, trillebåre og steinbukk. Ein grov seg ned i bakkant og tømde massen i framkant av terrenget. På den måten vart bana etter kvart 80 X 45 meter. I 1935 vart bana utvida til 92 X 50 meter, til ein pris av 1500 kroner. I 1947 vart bana på nytt utvida, denne gong til 92 x 58 meter, og dette kosta 22 000 kroner. Mest alt arbeidet vart utført på dugnad.
I 1948 får Hødd sitt første skikkelege klubbhus bak grusbana på Høddvoll. Før den tid, hadde klubben brukt loftet på gamlestova på Støylane til klubbhus. Olav Molvær fortalte at i hans oppvekst kunne ein framleis sjå hårtustane på bjelkane og kjenne sveittelukta av Hødd-spelarane. Det nye klubbhuset vart bygd i mur. Det hadde to små garderober med dusj i bakkant. Det var kvitmåla så lenge det stod.
Planane om å byggje grasbane på Høddvoll, vart lufta på årsmøtet til Hødd i 1951. På ekstraordinært årsmøte i 1952, vart det vedteke å gå inn for sentralidrettsanlegg i området ved Ulsteinvik barneskule. Ein fekk dette inn i reguleringsplanen til Ulstein kommune i området der Ulstein ungdomsskule ligg i dag. Det vart stor kaule om dette i bygda. Hødd ville til sentrum, men kommunestyret, med ordførar Knut Ertesvåg i spissen, meinte at dette arealet var for lite og heller ikkje framtidsretta, og dei ville heller satse på Høddvoll-området. I 1955 løyvde kommunestyre 10 000 kroner til ny grasbane på vilkår av at anlegget vart lagt til Høddvoll. Hødd kjøpte grunn med Hjalmar Molvær og Lars og Ole Holseker til den nye grasbana. Byggjestart på grasbana var i 1956, men det skulle endå gå sju lange år før grasbana stod ferdig. Etter mange år med stor dugnadsinnsats og dårleg økonomi, vart endeleg den nye bana opna 30. juni 1963 med stor festivitas og fotballturnering mellom VRF, Ørsta, Langevåg og Hødd. Den nye bana kosta 200 000 kroner.
Tribune vart det også på den nye grasbana, men berre fire trinn var ferdige til opninga. Seinare vart tribunen utvida med fleire trinn i fleire omgangar. Dei siste åtte trinna vart ferdigbygde til fot-ballsesongen 1967. Tribunen vart bygd på dugnad, og primus motor var Brage (Johannes Strand). Det blir fortalt at han tok folk med inn på slaktarbutikken og trua dei med kniv til å bli med på dugnad på Høddvoll.
Hødd rykka opp til Eliteserien i 1965, og då kom det krav om nytt klubbhus. Det nye klubbhuset stod ferdig i 1966 og var eit praktbygg med moderne garderobar, dusjar og eit stort møterom. Ulstein Trelastlager var byggherre for det nye klubbhuset.
Dette treningsfeltet vart utbygd på 1970-talet. Feltet vart brukt til trening for å spare grasbana.
Dette arealet vart kjøpt av Ulstein kommune i 1967 av Ole, Lars og Oline Holseker. Arealet vart kalla Holstun og lagt ut til byggjefelt. Det vart utbygd på slutten av 1960-talet og først på 1970-talet.
Denne vegen vart bygd i samband med utbygginga av Høddvoll. Vegen vart også tilkomstveg til det nye byggjefeltet Holstun.
Som me ser, er vegen under ombygging. Utover på 1970-talet, vart mest heile vegen til Hareid ombygd og fornya.
Gardsbruket Støylane (Gard nr. 10, bnr. 2) ligg på garden Holseker (Gard nr. 10, bnr. 1), og mykje av Høddvoll-arealet kjem frå dette bruket. På fotoet kan me sjå det gamle våningshuset mellom løa og det nye våningshuset. Loftet i gamlestova vart brukt som det første klubbhuset til Hødd. Roger Håndlykken laga eit fint måleri av gamlestova som Ulstein historielag gav som 100-årspresang til Hødd. Måleriet heng i festsalen på Høddvollhuset.
Denne sommarfjøsen låg kloss i Gamlevegen som går opp til Gamleeidet. Litt lenger mot nord-vest, kan me sjå eit mørkt drag i landskapet. Det er Vikelva.
Dette er ei bergnase som stikk fram i landskapet. Her er det flott utsikt mot nordvest over holmar og øyar. Osneshornet markerer grensa mellom gardene Skeide og Osnes.
