Henriette og Olavius og Ringstad blomster

Men i 1890 arva Olavius garden på Hovset etter ein barnlaus farbror og familien flytta til Ulsteinvik. Med tida vart det til saman 11 born: Johan f. 1887, Helga i 1889, Berta i 1892, Harald i 1893, Ole i 1895, Odd i 1897, Hans i 1899, Sigrid i 1901, Olav i 1903, Kathinka i 1904 og Edny i 1906. Johan og Kathinka reiste til USA og slo seg ned der, dei andre ni vart buande i Ulstein.

Johan gifta seg med Lina frå Meisingset, Helga var ugift, Berta gifta seg med Karl Sunde. Harald, som tok over garden på Hovset, var gift med Tora Nesset frå Hareid. Han var ein av eigarane i Ulsteinvik Møbel og Trevarefabrikk og hadde som arbeidsområde å teikne og stå for bygging av hus. Ole, som og var medeigar i firmaet, var gift med Oluffa frå Saunes. Odd var gift med Hansine som vidareførte arbeidet med blomsterhandel og kransebinding. Hans gifta seg med Gunhild Jøsok. Han dreiv fiskehandel på gamle Sjøborg, men døydde tidleg. Gunhild starta då og dreiv fiskematforretning i Ulsteinvik. Sigrid gifta seg med Georg Håheim som tok over landhandelen på Garnes, Olav var gift med Ingebjørg (Bjørg)Rossetvik. Han var oppsynsmann i Statens Hamnevesen. Kathinka gifta seg med svenskamerikanaren Karl Krigsmann, og Edny (Edda) var gift med Rasnus Moldskred.

Olavius var snikkar; han var ei tid sløydlærar ved Sunnmøre Ungdomsskule. Han starta med snikkarverkstad i kjellaren på Hovset der dei produserte tremøblar. Det var ungane si oppgåve å frakte varene til kundane, med hest og kjerre. I verkstaden hadde dei elektrisk sag, og ein dag var han uheldig og kutta av seg venstre handa like over tommelen. Seinare kutta han og av seg høgre peikefingeren i same saga, så ein stor del av livet hadde han kun fire fingrar. Han var visst ikkje den einaste av arbeidarane som mista fingrar i denne saga.

Verkstaden vaks og i 1915 kjøpte han tomt og bygde ved sjøen i Vik og grunnla firmaet Ringstad & Sønner. Olavius var ein stor humorist, og heile livet hadde han glimtet i auge og sette pris på ei god historie. Han snakka eit slags riksmål, men med halvemål. Ein gong hadde firmaet avertert i avisa: «Løp for livet til Ringstad & Sønner før prisstigning ….osv.» Det sat ein del karar i trappa hos «Mass» og ein av dei som sat og såg i avisa, las høgt medan han dikta: «Løp for livet, legg kursen an over Eidet til Hareid land, bedre varer, billigere pris og god behandling på folkevis. Hareid Trelast». Olavius reagerte: «`ør på svine`unden, `ar ikkje `an tatt våres avertissement». Dei fleste av sønene var flinke snikkarar, men Hans dugde ikkje. Ei historie er at Olavius sa: «nu `ar jeg endelig beviset. `ansen er gal, `an skulle tekke løtaket, før drøp, men nu renner det». Derfor måtte Hans få anna utdanning og vart sendt til Oslo og handelsskule. Derifrå sende han kort og konsist telegram heim: «Send penger, uavlatelig. Hilsen din sønn Hans». «Den `ansen, den `ansen. Men der er et godt `ode på den `ansen», sa Olavius.

Men etter nokre år kom Ringstad & Sønner i økonomiske vanskar. Firmaet vart nystarta i 1928 saman med Fredrik Fredriksen, Olav Seljeseth, Harald og Ole Ringstad, med Seljeseth som disponent og under namnet Ulsteinvik Møbel og Trevarefabrikk. Olavius var då 70 år.

Henriette må ha vore ei svært tiltaksrik og dyktig kvinne. Ho hadde elleve born, og dreiv gardsdrift i tillegg til at ho hadde somme av arbeidarane i kjellaren i kosten. Mykje av det daglege arbeidet fall nok på eldstedottera, Helga, som var eit arbeidsjern. Henriette var også flink med all slags handarbeid; ein del av arbeida hennar finst framleis.

Til høgre: Henriette og Olavius med dei ti eldste borna i 1905 (tante Edda var ikkje fødd). Bak frå venstre: Berta, Johan, Ole, Helga. I midten: Sigrid, bestefar Olavius med Olav på fanget, Harald, bestemor Henriette med Kathinka på fanget. Fremst frå venstre: Hans og Odd.

Men det som skulle bli det viktigaste, var blomster. Ho starta med import av planter, prydtre og frukttre frå England og frå Holland. I eldre hagar i Ulstein finst det enno rosebusker og prydtre som folk har kjøpt av Jetta, som ho var kalla. Til gravferder eller andre hendingar var det oftast Henriette som laga kransar eller blomsterdekorasjonar. I vekstsesongen vart levande, naturlege blomster nytta, men vinterstida vart kransane laga av dei nydelegaste blomster, laga av silkepapir. Var det lite arbeid i snikkarverkstaden, vart arbeidarene sette til å lage små blomsterblad. Dette arbeidet var dårleg likt av snikkarane, men det var viktig å nytte all arbeidskraft.

På Hovset laga ho til to frukthagar som ga rikeleg og god avling til langt frampå 70-talet. I heimen på Hovset var desse hagane kalla London Park og Edens hage.

Henriette la grunnlaget for Ringstad Blomster. Ho døydde i 1938. Svigerdottera, Hansine, førde arbeidet med kransebinding og blomsterhandel vidare og ho gjorde verksemda til ei moderne blomsterforretning. Hansine si svigerdotter, Åse, tok over og ho utvida til også å vere gravferdsbyrå. Ringstad Blomster heldt til i leigde lokale i Vik, men i 1981 flytta butikken inn i eigne lokale. I 2001 vart butikken seld til Greta Flø, mangeårig medarbeidar. I dag er det Viktoria Hareide som er eigar.

Olavius levde i 20 år etter at Henriette var død. Han deltok i gardsarbeidet, slo med langorv og på sine eldre dagar braut han jord med spett og steinbukk. Dette greidde han med fire fingrar. Han døydde i 1958, få månader før 100-årsdagen sin.