Ulstein Ten Sing 40 år

7. april 1978 blei det kalla inn til skipingsmøte på Ulsteinvik bedehus. Saklista til skipingsmøtet inneheldt reglement, val, økonomi, medlemsliste og namnespørsmål.

Sidan namnespørsmålet stod sist på saklista, blei ikkje namnet bestemt under sjølve stiftingsdagen. – Berre vas så seint. Seriøse forslag kan leverast til styret, meinte nokre. Andre igjen foreslo Frigjort eller Ulstein Ungdomskor. Ein foreslo Støpsel for å få kontakt med Stranda. Kontakt var namnet på ten sing-koret i Stranda. I protokollen etter stiftingsmøtet står der – Val av namn blei overlatt til styret.

Skipingsmøtet hadde samla 47 ungdommar, der ein starta med å synge saman. Samværet blei avslutta med frie vitnemål og song. Til slutt bad ein Fadervår og bad for koret og arbeidet vidare. Møtet blei heva 23.25. Kristen Ulstein var møteleiar og referent.

Koret var i første omgang ei interessegruppe underlagt Gnisten ungdomsklubb, og blei ikkje innmeldt i Norges KFUK-KFUM (Tidlegare Norges Kristelige Ungdomsforening) som eige ten sing-kor. Koret blei seinare ei eiga sjølvstendig eining, og fekk namnet Profil. Forsamlingshuset Fredheim var staden for øvingane. Styremøta gjekk på omgang og blei gjennomført av medlemmane i styret.

Aldersgrensa for å starte i koret var 7. klasse eller det som i dag er 8.klasse. Solveig Myrene blei valt til første formann i koret, og medlemskontigenten var sett til kroner 40. Det eksisterte allereie eit ungdomskor – dette koret deltok under Vintertreff i Volda i 1978.

Kari Eide var første dirigent for koret. Songvalet hadde eit moderne uttrykk og var prega av impulsar frå Jesusrørsla.

Jesusrørsla var ei radikal kristen rørsle som hadde sitt utspring i hippie-rørsla på slutten av 1960-tallet i USA. Bevegelsen begynte for alvor å breie seg ut på 1970-talet og kom også etter kvart til Europa og Noreg. Norske artistar som Frisk Luft med bl.a Arnold Børud og Rune Larsen og Tvers kom til å prege unge kristne i Noreg og songvalet til Profil.

I 1978 deltok Noreg og Jan Teigen i Melodi grand prix og fekk 0-poeng. Det var først ti år seinare at ten sing-rørsla brukte populærkulturen som rådde blant ungdommen. Så når Bee Gees song Nightfever og Queen rocka med We will rock you, var det ein snill ten sing-ungdom som stod på scena og song Befriad av Choralerna og En tigger satt ved veien av Arnold Børud.

Impulsar frå verda

Dei som leia koret bar med seg impulsane frå Jesusbevegelsen, og hadde eit sterkt ynskje om at koret skulle vere ein stad for kristen vekst og tru. “Lite innlevelse kan kome av at vi strevar og slit for å jobbe for Gud. Gud må gå foran. Vi har ikkje bedt i lag, hatt fellesskap” stod det i eit tidleg referat og “Andaktene er stort sett berre plaster på såret. Det må djuptgripande endring til hjå den einskilde.”

Ei viktig påverknadskraft for det sterke trusengasjementet var gruppa Salvation, som på 70-tallet fekk eit stort publikum over heile Sunnmøre. Gruppa, med ein tydelig kristen profil, fekk stor påverknad for det nystarta koret.

Første årsmøtet

Knapt eit år etter oppstarten, 9. februar 1979, blei første årsmøte gjennomført. 37 personar møtte fram på Fredheim. Solveig Myrene heldt fram som leiar, og Kari Eide fortsatte som dirigent. Torstein Aksnes går inn som vaksenleiar.

Om hausten reiser Kari frå bygda, og Arne Sæter tek over som dirigent. Denne hausten blir tanken om eit eige program og turné lufta for styret. Eit slikt program vil vere stimulerande for interessa, meinte styret. Eit slikt program sette idéen og tanke også på å etablere ei dramagruppe, og Oddbjørg Vartdal blei spurt om å leie ei slik gruppe.

Allereie tidleg i koret si historie tvinga det seg fram oppmøteliste og avkryssing, og i eit referat frå september i skipingsåret står det “mangel på ansvarskjensle mellom ungdomen tvingar dette fram”. Så alt var altså ikkje betre før…

Konflikt ved leige av utstyr

Ten Sing leigde i første omgang utstyr av gruppa Salvation. I styremøte 17. oktober blir det teke opp klage frå Salvation om brot i leigeavtalen. Konflikten spissar seg til, og koret vurderer å kjøpe eige songanlegg. “Det har vorte dyrt å synge evangeliet” og “Vi ser det slik at det ikkje er rett at ei kristen gruppering skal ta leige av ei anna kristen gruppering.” Styret utfordrar Bernt

Ulstein til å kome til ei minneleg ordning med Salvation. Samstundes sørger han for å lage eit overslag på songanlegget.

Våren 1979 skipar Ten Sing til både basar og utlodning for nytt songanlegg. Leigeforholdet mellom Ten Sing og Salvation er framleis uavklart hausten 1979, og tidleg i november vurderer styret å kjøpe det gamle anlegget til Salvation eller å kjøpe nytt anlegg. I siste styremøtet den 16. desember er saka framleis ikkje løyst. På nyåret kjem det brev frå Salvation, og som tilsvar ber styret om at det vert sett opp ei kontrakt for utveksling av utstyr mellom Salvation og Profil. Sidan dette er det siste som står i styrepapira, reknar ein med at saka fann si løysing.

25. til 27. januar i 1980 blei Vintertreff arrangert i Ålesund. Bjørn Eidsvåg stiller som hovudartist. Bjørn Eidsvåg er 25 år og har alt gitt ut to plater: Inn for landing (1976) og Bakerste benk (1978). Seinare same året kjem Endelig voksen. Treffet og opptreden til både Bjørn Eidsvåg og Profil blir ein suksess.

Fleire tidlegare deltakarar i Ten Sing har seinere blitt etablerte artistar, blant dei Morten Harket, Dagfinn Lyngbø, Sissel Kyrkjebø og Sigvart Dagsland. Ten Sing har vore ein viktig arena for mange artistar i Norge.

Arne Sæter dirigerte ten sing ein periode.

Våren 1980 sluttar Arne Sæter som dirigent, og koret står utan dirigent ved oppstarten same haust. Dette løyser seg ved at Åse Malm, som er elev ved Sunnmøre Folkehøgskule, tek på seg dirigentoppgåva, og under ein miljøkveld 21. oktober blir Karin Thorsen valt som formann.

Koret blir lagt ned

Utover hausten 1980 går talet på medlemmar ned, og i styremøte 4. desember bestemmer styret seg for å kalle inn til krisemøte 9. desember der ein drøftar situasjonen i i Profil – kva vil vi no? Styret vert einige om å forfatte eit opprop til aktuelle folk og invitere til møte i auditoriet på Sunnmøre Folkehøgskule. Interessa vil avgjere om koret skal halde fram eller leggast ned.

Det er ingen referat etter krisemøtet, men men mest truleg valde koret å halde fram. Det vert likevel ei kort periode. 15. januar 1981 blir siste styremøte gjennomført, og koret opphøyrer vinteren 1981.

Kristin Husøy.

I august 1982 blir ten sing starta på nytt. I referat frå leiarsamling 13. august står det: Profil må startes igjen! Det er Kristin Flacké Husøy som stiller som musikalsk ansvarleg og dirigent.

Øvingsdag blir flytta til fredag, og ungdomslaget får dette arbeidsåret ny eittåring, Frode Midttun.

Interessa for koret er formidabel, og på det meste er 120 ungdommar samla på Fredheim til øving kvar fredag. Populariteten til koret stig, og utover hausten får koret mange forespørslar om opptreden; forbundsfest, u-landskveld, weekend på Vaksvika, gospelkveldar m.m. Koret går til innkjøp av kormapper og investerer i slagverk.

Ten Sing går no inn i si glanstid på Sunnmøre. Det er store ten sing-grupper i fleire av bygdene og ungdomar møter i hundretal til øvingar på Hareid, Volda, Gursken, Ålesund, Sykkylven, Stranda og Ulsteinvik. Og dei årlege vintertreffa samlar hundrevis av ungdom. Vintertreffet i Ulsteinvik i 1985 samlar over 700 deltakarar.

Helga 28. til 30. januar 1983 reiser Profil til Stranda for vintertreff. For koret blei det ei spesiell hending då scena knelar for tyngda av all ungdommen som var oppe på scena. Scena sig ned i bakkant. Ingen blir skada, men det ser dramatisk ut når pianisten må halde på pianoet slik at det ikkje skal ramle ut for scenekanten. Under Vintertreffet i Stranda fekk Voldagruppa

BokkeReidars Bluesband sitt store gjennombrot.

I møte 9. februar 1983 blir styret einige om å opptre på årsmøtet for krinsen, ungdomskveld på bedehuset i Ulsteinvik, gospelkveld på Sunnmøre Folkehøgskule og konfirmantfest på Fredheim. I tillegg planla styret ein opptreden for elevane ved ungdomskulen.

Kristin går ut i fødselspermisjon hausten 1983. Denne hausten går Svein Rødset og Odd Magnus Osnes inn som vaksenleiarar. Aktiviteten er høg, og koret har stor oppslutnad.

Det er i arbeidsåret 83/84 skrive få styrereferat, og det er først hausten 1984 at referatskriving og faste styremøte kjem på plass igjen. Det er Asbjørn Vattøy som er formann. Oppmøte og talet på ungdomar er stort, og i styret drøftar ein både ro og orden – Rydding er eit problem som stadig er kjedeleg og lett å stikke i frå, står det i referatet tidleg på hausten dette året. Og i mars året etter står det at ryddegruppa fungerer ikkje.

Det store arbeidet hausten 1984 er planlegginga av det første vintertreffet i Ulsteinvik. Likevel fekk ein tid til øvingshelg på Dimna skule 3. november. Og Kristin Husøy er tilbake som dirigent.

Vintertreffet blir for første gong arrangert i Ulsteinhallen. Med over 700 deltakarar var dette det største vintertreffet til no. Bergensartisten Bjarte Leithaug var hovudtrekkplasteret, og Profil var vertskap for arrangementet. Bibeltimehaldar var Leif Larsen, og ungdomane gjekk i fakkeltog frå Ulsteinhallen til sentrum for Namibia. Kirsti Pedersen Haugen hadde ansvar for allsongen, og den lokale gruppa Holy Ghost Band opptredde. Arrangementet blei ein suksess.

Hausten 1985 stiller Arild Myklebust som vaksenleiar. Vaksenleiarane har vore viktig for det gode miljøet i Ten Sing og gav arbeidet stabilitet. Norges KFUK-KFUM har som motto vaksent nærvær og ungt ansvar. Det har koret praktisert i alle desse førti åra.

Våren 1986 er det kassettinnspeling for musikklivet i Ulstein på Dimna skule, og Profil deltek på kassetten med ein song av Hans Inge Fagervik.

Denne hausten reiser Kjersti Kleven til Tyskland som representant for Ten Sing Norway. Saman med over 40 andre norske ungdommar opplever Kjersti enorm suksess. Dette er starten på Ten Sing Norway og eksportering av ten sing-idéen til Europa.

Året etter reiste Siri Sundgot og Magne Grimstad jr. til England. Men før Magne reiste var han dirigent for koret i arbeidsåret 86/87.

Avslag på søknad om nye basstrengar

Hausten 1986 reiser koret til Bergen og Os og overnattar ved Kongshaug Folkehøgskule. Turen er først og fremst ein sosial tur. Interessa er stor, og det blir leigt inn tre bussar til turen.
Styret var særs aktiv i denne perioden med 106 saker i 1986 og 122 saker i 1987. Våren 1987 søker bassist Gaute Hopland om nye bass-strengar. Styret gjer fylgjande vedtak: Forespørsel om kjøp av nye bass-strengar avslått fordi han allereie har fått to sett.

Frivillig arbeid blir utover åtti-talet meir og meir formalisert. Vaksenleiar Svein Rødset undersøker på nyåret i 1987 om livsforsikring for heile koret. Han legg fram for koret eit tilbod frå Vesta-Hygea. Våren 1987 blir Fredheim bygd om, og ten sing foreldre blir oppfordra til å stille opp til dugnad. Magne Grimstad jr. er dirigent for koret.

Våren 1987 har dei to ten sing-kora på øya felles styremøte for å planlegge Ten Sing Galla på Ulstein Samfunnshus. Det er denne våren Ten Sing set opp eigen musikal og reiser på turné. Og framleis er det eit problem med rydding på øvingane. I sak 51/87 står det som vedtak: Vi må skjerpe oss.

Profil var på si høgde vinteren 1988. Med Einar Grimstad som dirigent og John Olav Sæter som formann, reiser koret til Tyskland i slutten av februar (19. -28.2). Då hadde styret, foreldre og vaksenleiar Svein Rødset gjort ein formidabel innsats med bl.a å samle inn midlar til å chartre fly frå Vigra til Tyskland.

Profil Ten Sing blei tekne i mot som songstjerne når det besøkte byar som Tübüngen, Weissenburg og Memingen. Enkelte stadar møtte over 1000 publikum opp. Og det var ein opprømt banksjef Kjell Garnes som kom heim etter turen og utropte: Ich bin auch ein Profiler.

Det var ein aktiv 10-åring som tok til på eit nytt semester hausten 1988.

I løpet av desse 40 åra har fleire tusen ungdommar vore innom koret. Det er ingen tvil om at koret har vore ein viktig arena for ungdom i Ulstein og ein flott stad for både åndeleg og musikalsk utvikling. Ulstein Ten Sing er ein vital 40 åring. Koret er i dag eit av dei største ten sing-kora på Sunnmøre.

40-årsdagen vart feira med jubileumskor og gospelkveld på sjølvaste skipingsdagen, 7. april. Jubileumskoret var sett saman av songarar frå dagens tensingkor i tillegg til tidlegare medlemmer som representerte så å seie heile koret si 40 år lange karriere.

Også repertoaret, som jubileumskoret lærte seg gjennom ei intensiv øving på Fredheim nokre timar før gospelkvelden i kyrkja, gjenspegla dei førti åra som har gått. Her var alt frå Andrae Crouch til Bjørn Eidsvåg, Sigvart Dagsland og Marthe Wang. Det var dei to tidlegare dirigentane, Kirsti Pedersen Haugen og Sølve Styve Sæbø som tok hand om instruksjonen.