Con Moto 40 år

Allereie eit år før hadde Sidsel Saunes vore i kontakt med musikkskulen om der kunne vere ein aktuell dirigent. Det var der ikkje då, men så i 1978 dukka eit nytt namn opp. Oddvar Eiksund skulle ta til i stillinga som ny leiar for musikkskulen, og Sidsel vart oppmoda om å skaffe ei liste over interesserte medlemer til eit nytt kor, og så søke om opptak i musikkskulen. Saman med Sylvei Pilskog klarde dei i løpet av sommaren å få tak i 20 – 25 som var interesserte, og 12. september 1978 kl. 20.00 var vi samla til første øving.

Oddvar Eiksund – første dirigent

Oddvar Eiksund, som då var 28 år, var oppvaksen i ein musikalsk familie på Runde. Han hadde utdanning frå Noregs Musikkhøgskule, med bl.a. diplomeksamen i komposisjon. Litt erfaring frå korarbeid hadde han skaffa seg som dirigent for eit blandakor i Enebakk, og no skulle han flytte til Ulsteinvik med kone og born for å bygge opp den kommunale musikkskulen i bygda. Det var inga enkel oppgåve i ei tid der musikkskulane både i vår kommune og andre stader måtte kjempe ein årleg budsjettkamp mot andre sårt tiltrengde formål i kommunen, og der trusselen frå «øksekomitear» om nedskjeringar og endåtil avvikling, låg som ei klam hand over dei som skulle skaffe elevar og lærarar til dette viktige nybrotsarbeidet.

Fjorten kvinner og åtte menn

Så sat vi der då den første kvelden, fjorten kvinner og åtte menn med forventning i blikket, men usikre på kva som venta oss. Nokre hadde vore med i kor før, men for dei fleste var dette noko nytt, og for den som ikkje var notekyndig var det mykje nytt å sette seg inn i. Dei første notane vi fekk utdelt var «Old Mac Donald» og «Vem kan segla.»

Av dei åtte mennene som møtte opp den første kvelden var det tre tenorar. Skjebna ville det slik at alle på tenorrekka var innkalla til repetisjonsøving i militæret den hausten, og etter eit par veker på Setnesmoen var det berre to tenorar som vende attende til koret. Med dette mannskapet gjekk tida fort framover mot jul og vår første oppgåve, som var «Vi syng jula inn» i kyrkja i desember. Vi hadde lært to julesongar, og med «Coventry Carol» og «Vår Herre han hvilte i krybben så trang» kom vi visst rimeleg bra i frå debuten.

Verdslege songar på bedehuset

Så var vi over i 1979, og litt ut i januar var koret klart for ein ny elddåp. Nokre av oss var nok litt skeptiske til å synge verdslege songar som «Bruremarsj frå Seljord» og Evert Taubes «Nocturne» på bedehuset sin julefest for eldre, men skeptikarane forstod fort at her tok vi feil, då sokneprest Fiskerstrand reiste seg og fekk med seg resten av dei frammøtte i entusiastiske klappsalver då vi var ferdige med vårt bidrag. Då forstod vi at her hadde vi treft blink, og at her hadde vi funne vårt publikum.

Denne våren var det songarstemne i Ulsteinvik. Det var Ulstein Mannskor og Hasund Mannskor som var vertar for songarar frå Sunnmøre, og det nystarta Musikkskulekoret vart inviterte som gjestekor.

Korarbeid på Sunnmøre

Korarbeid starta tidleg i Ulstein. I Johan H. Grimstad/Sunnmøre Korforbund si bok «Korsong på Sunnmøre», som kom ut i høve Sunnmøre Korforbund sitt 100 års jubileum i år 2000, skriv han at det første blandakoret i Ulstein vart skipa i 1874. Berre ti år seinare vart Ulstein Mannskor starta. Også det å arrangere songarstemne har rike tradisjonar. Tidlegare var det vanleg med friluftskonsertar under songarstemna, og i vår kommune var det i Volleskogen og Gotebakkane slike vart avvikla. Eit spesielt stemne har JHG nemnt i boka si: «Ei finevershelg i 1944 var det songarstemne i Ulsteinvik, på Vatne og på Stranda. Det var mest eventyrleg kor mykje folk som samlast ved kyrkja framfor kyrkjekonserten.» Om friluftskonserten i Volleskogen står der: «Folkemengda var veldig, den største ved noko av Sunnmøre Songarlag sine stemner. Der var truleg samla mellom fem og seks tusen menneske.»

Den store folkemengda viste vel litt av det behovet folk hadde for å kome saman i krigsåra.

Dette songmiljøet var det vårt kor kom inn i. Gode songtradisjonar der vi kunne velje mellom tre stemne på Sunnmøre kvar vår. Vi vaks saman. Vi likte å vere i lag, og vi gledde oss kvar vår til bunader, finklede og fana skulle gjerast klar for ei ny stemnehelg. Medlemstalet auka etter kvart, og på eit ark frå Ulstein Musikkskule datert 09.10.79 står der 37 namn.

Styret dette første året var slik samansett: Sidsel Saunes som leiar, og med Sylvei Pilskog, Torill Strandabø, Jarle Myklebust, Gunnar Vatne og dirigent Oddvar Eiksund som styremedlemer.

På årsmøte hausten 1979 sa Sidsel frå seg attval, og Gyda Ertesvåg kom inn som ny leiar.

Fekk namnet Con Moto

No starta arbeidet med å finne namn på koret, få meldt oss ut av musikkskulen, og å bestemme kva for ein landsorganisasjon vi skulle vere tilknytt. Det var tida før alle hadde PC og kunne sende mail, så det gjekk nokre høgtidelege brev mellom vår leiar og den som då var leiar i Sunnmøre Songarlag Nils Hatlevik. Hatlevik var frå Skodje, og han hadde vore leiar for Sunnmøre Songarlag i 11 år då han med gode råd og rettleiing hjelpte vårt kor inn i rekkene.

Hausten 1979 vart det også klart at vi ikkje lenger skulle høyre til i Ulstein Musikkskule, og at vi derfor heller ikkje kunne kalle oss for Musikkskulekoret lenger. Oddvar hadde vorte ein populær mann i koret, og nokon ville foreslå «Oddvars Kor.» Andre forslag var knytt til fuglelivet på Runde, og her vart «Havsula» kasta fram som kornamn. I 1958 hadde Johan H. starta eit blandakor i Ulsteinvik. Der var både Sidsel og ektemaken Olav med. Dette koret vart lagt ned etter kort tid, og Olav foreslo no at vårt kor kunne heite Con Moto slik namnet på det gamle koret deira hadde vore. Slik vart det, og koret vårt fekk namnet Con Moto som tyder «med liv.»

Med fint namn, og som nyinnmeldt medlem i Sunnmøre Songarlag, vart neste viktige steg for koret å få laga fane. Arkitekt Sveinung Lofthus kom inn som ny medlem i koret hausten 1979, og han tok oppdraget med å lage logoen til koret – ein raud CM på kvit botn. Arne Olav Gundersen laga stang og dekorasjonsspyd, medan to av damene i koret, Turid Gundersen og Turid Ringstad tok ansvaret for syarbeid og montering av band, snorer og duskar. Ei fane vi har bore med stoltheit i snart 40 år.

Samarbeid med Ulstein Trekkspelklubb

I april 1980 samarbeidde vi med Ulstein Trekkspelklubb om ein bygdekveld på samfunnshuset i samband med Ulsteindagane. Det var Odd Loen i trekkspelklubben som tok initiativ til dette samarbeidet, som seinare heldt fram med at vi i lag ga ut ein kassett som vart kalla «For fulle segl.» Repertoaret på kassetten spenner frå gammaldans til Evert Taube og med Margrete Sæteråsen Eiksund som solist på nokre utdrag av Frantz Lehar sine operetter. Margrete er gift med Oddvar, og vi hadde fleire framføringar i lag med henne. I intervju med Sunnmørsposten i august 1980 kunne

Gyda fortelje at vi då hadde ca. 40 medlemer frå bygdelaga i Ulstein.

Prots ropte bravo

Før vi avslutta vårsesongen var vi på songarstemne i Ørsta. Etter songartoget på søndag var det friluftskonsert ved samfunnshuset. Vår dirigent var ikkje så begeistra for at vi skulle synge ute, men det må vel ha gått bra, for etter at dei siste tonane frå koret og solist Margrete hadde døydd ut høyrde vi Prots rope bravo i bakgrunnen. Den anerkjenninga gjorde oss godt.

Oddvar dirigerte også Fellesorkesteret på denne tida, og saman med dei, i tillegg til Vanylven Blandakor og Bergsøy Blandakor øvde vi utover hausten til konsertane vi skulle halde i november. Koret fekk fleire nye medlemer, men med Oddvar som dyktig dirigent, Svein Eiksund som fast pianist og Torill Strandabø som øvde damestemmer gjekk øvingane med liv og lyst.

I november starta turneen med tre kor og Fellesorkesteret med konsert i Herøy Kulturhus, og seinare med konsertar i Ulsteinvik og i Syvde. I avisreferat etter konserten fekk kor og orkester med solistane Margrete Sæteråsen Eiksund, Arild Grimstad og cellosolisten Gudleik Eiksund rosande omtale.

Også 1981 vart eit aktivt år med songarstemne i Syvde om våren, og med konsertar i lag med Aalesund Mandssangforening, i lag med Fellesorkesteret og i lag med Ulf.

1982 var eit spesielt år

Året 1982 vart eit spesielt år for Con Moto. Denne våren var det songarstemne i Sykkylven, og dirigenten og underteikna tok laust med tresnekke frå småbåthamna i Ulsteinvik tidleg laurdag morgon. Vi budde i båten i småbåthamna i Sykkylven heile helga, medan resten av koret reiste innover i privatbilar og vart innlosjerte rundt om i sykkylvsbygda. På songarfesten om kvelden fortalde Oddvar at han skulle flytte frå Ulsteinvik, og at vi måtte sjå oss om etter ein ny dirigent. Dette var ei trist melding å få. Oddvar var ein god pedagog og ein dyktig instruktør. I tillegg var han ein kjernekar som var svært godt likt av kormedlemane. Han hadde stått i spissen for å bygge opp koret frå starten av. Vi syntest vi hadde nådd langt på desse fire åra, og no frykta mange for korleis det ville gå med koret vidare. Etter dansen var mange av kormedlemane samla i snekka i småbåthamna, og både der og blant koristane elles var det nok dette som opptok oss mest resten av stemnehelga. Oddvar fortalde at han hadde fått stilling i musikkskulen i Ringsaker, og at familien skulle flytte i løpet av sommaren.

På ettersommaren fekk vi den gledelege meldinga at vår faste pianist gjennom fire år – Svein Eiksund, ville ta på seg oppgåva som dirigent for koret. Han kjende vi som musikar og god pianist, og litt erfaring som kordirigent hadde han frå si tid som lærar på Godøya. Der hadde han vore med å starte Godøy Blandakor i 1968, og dette koret dirigerte han til familien flytta til Ulsteinvik i 1971.

Spente og glade møtte vi til nytt korår i august 1982. Der vart nye planar lagde, og med friskt mot og ungdommeleg entusiasme, arbeidde vi fram mot den store bygdekvelden vi skulle arrangere på samfunnshuset i oktober. Gamle fortryllande staskjolar vart henta fram, og for karane vart det bestilt hattar, vestar og sløyfer i god gamal stil. Programkrefter vart bestilt, og avtalar vart gjort med lokalradioen, gamledirigenten og andre som skulle bidra til ei god «Good old days» framsyning. På denne tida var der store trafikkale omveltingar i Ulsteinvik sentrum, der kommunen styrde folk og biltrafikk ved hjelp av kantsteinar. Dette ga koret inspirasjon til å skrive visa «Kantsteinvik.» Damekoret «Druen» skapte også jubel i salen, med gjøgling og komikk på høgt nivå.

Svein Eiksund fekk sin vellukka elddåp

Denne kvelden fekk Svein sin vellukka elddåp som dirigent for Con Moto. Ei oppgåve han delte med gamledirigenten, som saman med Margrete hadde teke turen over fjella frå Ringsaker.

Til årsfesten vår i Rådhusets Selskapslokale på Hareid i januar 1983 var også Oddvar invitert. Koret var inne i sitt femte år, og «jubileet» vart feira med god middag og underhaldning for og med kormedlemer med følgje. Før Oddvar tok siste ferje til Sulesund for å køyre heim om natta, vart han utnemnd til æresmedlem i koret. Medaljen var ein slipt fjørestein med inskripsjon.

Etter femårsmarkeringa gjekk koret inn i ei aktiv periode som strekte seg over fleire år. Det var stort for oss å få øvingshelg i lag med andre lokale kor, og der Carl Høgseth var instruktør.

Etter den vellukka «Good old Days»-framsyninga bestemte vi at litt av overskotet skulle gå til ei gåve til Eldresenteret. Her kontakta vi pensjonert røyrleggar Ingvar Svoren som laga ei vakker vindmølle. På eit arrangement i Bygdestova i april vart denne avduka av ordførar Asbjørn Flø. Vindmølla står fortsatt i inngangspartiet til Bygdestova i Ulstein.

I 1984 arrangerte vi songarstemne saman med Ulstein Mannskor, og i november var vi med på fleire konsertar i lag med Fellesorkesteret som dette året runda 30 år.

Båttur med ”Aarvak”

Den mest spesielle opplevinga for koret i 1985 var nok båtturen med ishavsskuta «Aarvak» frå Hareid til Godøya siste søndag i september. Det var musikk- og songkrefter frå Godøya som inviterte oss for å ta del på deira solidaritetskonsert for Afrika i samband med årets TV-aksjon. For oss i Con Moto vart det ein kjekk og minnerik tur med den gamle skuta, der vi fekk sjå oss om i båten, og der vi trengde oss saman i messa og varma opp og song både før og etter konserten. Kanskje ein av dei siste turane skuta tok før den vart sett på land og kom under tak på Brandal nokre år seinare?

”På sangens Winge” og eigen kassett

I mars 1986 samarbeidde vi med reisebyrået om to bygdekveldar som vi kalla «På sangens Winge.» Her var to av medlemane i koret på «reisefot» i Europa, reisebyrået viste lysbilde frå populære destinasjonar, og kvar av kveldane vart det trekt ut ein sydentur blant publikum.

Om hausten var vi med på jazzkonsert i kyrkja i lag med Bengt Hallberg og Karin Krogh.

I 1987 ga vi ut eigen kassett, og vi deltok på festkveld på samfunnshuset ved kommunen sitt 150 års jubileum.

10-årsjubileum

Jubileumsåret vårt 1988 vart eit spesielt aktivt år for koret. Arvid Myklebust overtok som leiar etter Olav Saunes som hadde reist til Spania på langtidsopphald saman med si Sidsel. På årsfesten var også den nystifta leikarringen i sving for første gong. For sin store innsats for koret vart Sidsel seinare utnemnd til æresmedlem i Con Moto.

Fredag 29. april hadde vi bygdekveld i samarbeid med næringslaget i Ulsteinvik. Butikkane hadde langope, og der var mykje folk i sentrum denne vakre vårkvelden. Omtrent 800 av dei var innom samfunnshuset på våre to arrangement, og ifølge avisreferat vart det ein braksuksess. Mykje av æra for det måtte vi nok dele med kveldens gjesteartist Olga Marie Mikalsen. Ho song åleine og saman med koret, og med Svein som dyktig akkompagnatør. Innimellom intervjua han henne, der ho fortalde frå mange av sine konsertar bl.a. i New York, London og Paris. For koret toppa det seg då vi song «Våren» med henne som solist.

På denne tida hadde koret eit luksusproblem. Med 60 medlemer hadde vi sett inntaksstopp og oppretta «venteliste» for nye songarar. Dei fleste i koret kom frå Ulstein, men vi hadde også fleire medlemer frå Hareid, Herøy og Sande. I juni reiste vi på tur til London i lag med ektemakar.

Jubileumskonsert på Fredheim

I oktober hadde vi jubileumskonsert på Fredheim, der også Oddvar og Margrete deltok. Dette året tok vi også «leikarringen» eit skritt vidare. Her fekk vi hjelp av ein instruktør frå Surnadal, som i løpet av ei helg i kantina på Kleven lærde oss kordans. Vi hadde nok store planar om å bruke dei tileigna ferdigheitene til noko konstruktivt, men når instruktøren vende nasen heimover etter fullført kurs, vart det etter kvart vanskeleg både å utøve, og å nyttiggjere seg teknikken til praktisk bruk.

På denne tida var det vel også at vi begynte å vere med på skipsoverleveringar frå Kleven Verft. Det var populært blant koristane når vi møtte stivpynta til overleveringsfestar på hotellet, og der vi etter å ha gitt vårt bidrag til gjestane alltid fekk servert kaffi og kake med noko attåt. Populært var det også for dei ofte langvegsfarande gjestane, og for mange var det nok uvant at sjølvaste verftsdirektøren vart kidnappa frå middagsbordet for å synge solo saman med koret.

Siste helga i mai 1990 arrangerte vi songarstemne med rundt 500 songarar totalt.

I november fekk vi vere med på konsertsamarbeid med kvartetten Quattro Stagioni på Fredheim. Kvartetten vart leia av Carl Høgset, og for Con Moto var det stort å bli spurt om å delta på dette arrangementet. Etter konserten fekk vi ein negativ kommentar i Vikebladet for vårt val av repertoar denne kvelden. Ei dame skreiv til avisa og meinte det var ein sjeleleg og estetisk kollisjon når vi under Jesusbildet på Fredheim kunne synge «What shall we do with the drunken sailor.»

Med Unni Teigene Ulstein som ny leiar for koret var vi i 1992 på Landssongarstemne i Lillehammer. Der deltok vi på prosjekt leia av Prots, og vi song i kyrkjer og kulturhus. Vi budde i Follebu, og der fekk vi bl.a. synge tekster av Bjørnson utanfor Aulestad før vi gjekk i prosesjon til feiring av 100 års jubileum for kulturhuset Kornhaug.

Jakob Sande i ord og tonar

Koret si storsatsing i 1993 var ein presentasjon av Jakob Sande i ord og tonar, og ein fredagskveld i slutten av april var samfunnshuset overfylt lenge før programmet starta. Etter våre to framsyningar i Ulsteinvik, måtte vi ut på «turne» til Fosnavåg, Fjaler og Vanylven.

Dette året gjorde Norge Rundt opptak med koret under overlevering av siste skipet som Kleven leverte før dei vart ein del av Kværner. Innslaget vart vist på NRK om hausten.

Ved dei Nynorske Festspela i september framførde vi Jakob Sande i Ørsta, men nokre dagar tidlegare hadde vi same programmet under Norges Korforbund sitt landsmøte i Geiranger. Ein tur til Skageflå vart det også. Der song vi for landsmøtedelegatane, og det sette dei tydelegvis stor pris på. Forbundsleiar Theodor Lind i Norges Korforbund takka for songen gjennom Vikebladet, og der sa han bl.a.: Då Con Moto der – med himmelen over oss og Geirangerfjorden under oss – song «Når fjordene blåner», ja, då var det ei oppleving som gjekk rett inn i sentralnervesystemet til alle saman.

Den norske Matfestivalen

Den norske Matfestivalen inviterte i 1996 til sin amatørkonkurranse «Årets musikk-kokk» i Ålesund. Deltakarar var tre musikkorps og seks kor, og til dei innleiande rundene stilte vi med Eldar Ulstein og Richard Abbou. Dei vann si klasse, og vi kunne reise heim og forberede oss til finalen på laurdag. Laurdagen kom med fint sommarvêr, og det var ein entusiastisk gjeng som reiste til Ålesund denne ettermiddagen, der dei to kokkane våre laga dagens vinnarrett med bl.a. jekteklippfisk. Kora og korpsa konkurrerte om den beste underhaldninga, og der varta vi opp med bl.a. Jakob Sande + eit vakkert bordvers. Stemninga var stor då dommarane kåra Con Moto med sine to eminente kokkar til vinnarar, og vi kunne ta imot ein sjekk på kr 10.000,00. Sigeren vart feira med middag på Hotell Norge før vi i tolvtida tok hurtigruta til Torvik og reiste heim.

Thank you for the music

Laurdag 19. oktober hadde vi to framsyningar med slagerparaden «Thank you for the music.» Det var to fulle hus og stormande jubel på samfunnshuset. Dagen etter hadde vi same framsyning på Fiskå, og i november var vi på Moldtustranda med den. I romjula hadde vi endå ei framsyning av kabareten på samfunnshuset, og denne kvelden delte vi overskotet med ein sjekk på kr 5.000,- til Casa Emanuel og Inger Harringtons arbeid blant gatebarn i Brasil.

Våren 1997 reiste vi på Landssongarstemne til Bergen. Vi budde sentralt i byen, og alle aktivitetar forgjekk i Grieghallen og i sentrum elles. Her var det vi vart kjende med komponisten Per Indrehus frå Voss som vi seinare samarbeidde med ved kyrkjekonsertar i Gursken og i Ulsteinvik.

Songarstemne, 20-års jubileum, tur til York og rettssak

Under Ulsteindagane første veka i juni 1998 hadde vi songarstemne med 350 songarar. Denne gongen viste vergudane seg frå si beste side, og uteaktivitetar i sentrum kunne gå som planlagt. Songarfesten hadde vi på samfunnshuset, der vi endå ein gong framførde «Thank you for the music.»

I oktober inviterte vi til jubileumskonsert på Fredheim, og rett etterpå reiste vi til Voldakyrkja, der vi song inn ein ny CD «Frå hav til katedral», og med Mona Julsrud som produsent. Ei raus gåve frå vår eigen John Kleven finansierte produksjonen, og tanken hans var at inntekter frå salet skulle kunne brukast til vidareutvikling av koret. «Eg vil gjerne legge igjen ein varig verdi i kulturlivet», sa han.

Med Tore Øvrebø som ny leiar i koret, reiste vi i 1999 på ein fem dagars tur til York i England. Der deltok vi på ein korfestival, og vi song i den store katedralen York Minster.

Dette året fekk vi ei rettssak mot oss, der vi vart dømde til å betale for uniformer vi hadde bestilt, men som vi ikkje ville ta imot fordi dei etter vår meining ikkje oppfylte våre kvalitetskrav.

70-årsjubilant fekk besøk av Jon Eikemo

Saman med 70 års jubilanten John Kleven inviterte vi i august 2001 til konsert på Ulstein Hotell. Her medverka også ei messinggruppe frå Hasund og Dimnøy Ungdomsmusikkorps og eit samansett mannskor. Mona Julsrud var solist med koret og ho hadde eiga avdeling. Heilt uventa for jubilanten og publikum kom også Jon Eikemo på besøk denne kvelden. Hans bidrag var ei gåve frå døtrene, og dette bidraget fall i smak både blant publikum og jubilanten.

Prinsesse Märtha æresgjest

Under Kulturdagane i Ulstein i november 2001 skipa kommunen til stor kulturkveld på Ulstein Hotell med prinsesse Märtha som æresgjest. Con Moto framførde eigenprodusert song til prinsessa, og ifølge avisreferat gjorde den at både ordførar Berset og prinsessa vart rørt til tårer.

Julekonsertar og Beethoven

Med Linda Barstad som ny leiar hadde vi i desember 2002 «Juletonar» i Ulstein kyrkje, Runde bedehus og Gursken kyrkje i lag med Oddgeir Bruaset og skuleelevar frå Hasund og frå Gursken. Bruaset fortalde om opphavet til dei ulike julesongane.

I mars 2002 hadde vi «Young Beethoven» på samfunnshuset. Med innleigde dansarar og musikarar, med leigde kostymer frå operaen på Nordfjordeid og med to gjennomgangsfigurar som fortalde frå Beethovens liv, gjennomførde vi tre framsyningar i løpet av ei helg. Regien hadde Dagfinn Olav Bye. Dette var vår største og mest påkosta prosjekt nokon gong, og vi var glad og letta over at publikum fylte samfunnshuset, og at vi fekk gode tilbakemeldingar. Dette var mektige saker, sto det i Vikebladet, og ein kjend fotballmann og kommunepolitikar som droppa tippekampen og gjekk på vår framsyning i staden, angra ikkje eit sekund, skreiv han i Vikebladet nokre dagar seinare.

I juni reiste vi på vellukka kortur til Budapest, der vi bl.a. song i Mathiaskatedralen saman med eit jentekor frå Molde.

25-årsjubileum

På dei tre 25 års jubileumskonsertane våre på Fredheim om hausten samla vi 275 publikummarar til eit samansett program. Med innleigde musikarar og til saman sju solistar frå eigne rekker vart dette ein vellukka konsert som både koret og publikum likte.

Med Andreas Hauge som ny leiar samarbeidde vi i 2004 med Volda Mannskor og solist Rein Alexander om kyrkjekonsertar i Herøy, Volda og Syvde. Publikum svikta ikkje denne gongen heller, og dei likte det dei fekk høyre. Kjetil Eiksund var dirigent for Volda Mannskor. Han var i studietida – over nokre år, Con Moto sin faste, dyktige og godt likte pianist.

Fransk invitasjon

Som ledd i eit prøveprosjekt der kulturutveksling var eit aktuelt tema, fekk vi i 2005 spørsmål frå Berg-Hansen Reisebyrå om å ta imot eit fransk kor året etter, og torsdag 25. mai 2006 landa koret Syrinx og deler av symfoniorkesteret i Bordeaux på Vigra. Same kvelden hadde vi konsert i Ulstein kyrkje i lag med dei. Ein konsert som vart svært godt motteken, og der det franske symfoniorkesteret si framføring av «Våren» vart trekt fram som noko av det beste som hadde vore servert i kyrkja. Laurdag ettermiddag hadde vi same konserten i Herøy kyrkje, og derifrå reiste vi rett til fest i Aktivitetshuset på Vikholmen. Her vart det sosialt samvær mellom kora, og i tillegg vart det offisiell avskjed med vår trufaste dirigent gjennom 24 år. Svein vart utnemnd til æresmedlem i koret, og som avskjedsgåve fekk han eit nydeleg kunstverk i lappeteknikk som Turid Bakken hadde laga.

Frå hausten overtok Kari Aske Osnes som dirigent, og saman med henne reiste vi i september på gjenvisitt til Bordeaux, der vi hadde to konsertar i lag med Syrinx og Ensemble Orchestral de Bordeaux. Med ny dirigent og nokre nye songarar i koret, starta vi denne hausten med heilt nytt repertoar, og i november inviterte vi til Skjæråsenkabaret med dikt og songar på Hasund Bygdehus.

Konsert på Sjøborg og Eiksundsamklangen

Mona Julsrud kom til Ulsteinvik i november 2007, og i lag med henne og pianist Bård Dahle frå Ørsta inviterte Con Moto til konsert på det nye kulturhuset Sjøborg. Dette året skaffa Kari kommunen ein ny innbyggar, og brått var Svein igjen på plass som koret sin dirigent.

Eiksundsambandet vart opna våren 2008. Saman med 10 andre kor og rundt 300 songarar deltok vi på Eiksundsamklangen med konsertar i Volda kyrkje og i Herøy kyrkje.

Under Ulsteindagane hadde vi songarstemne med 350 songarar. Songartoget på laurdag gjekk i strålande sommarver, og med alle skulekorpsa i kommunen som medverkande.

I 2009 vart Rita Lehmann ny leiar for koret, og i september hadde vi «Hildegunn + Con Moto = sant.» Eit samarbeid med Fredrik Steen og Ørjan Liavåg med ca. 300 i salen på Sjøborg.

Våren 2010 leigde vi buss og køyrde til Sunnfjord på songarstemne. I strålande ver tok vi ferje frå Askvoll og kom til idylliske Atløy, der vi vart innkvarterte i to hus ytterst mot havet.

Flykaptein venta på koret

Korturen vår til Krakow våren 2012 fekk ein litt spesiell start, då flyproblem på Vigra gjorde at vi vart forseinka til Gardermoen. Heldigvis løyste det heile seg ved at flykaptein Frank Dimmen frå Ulsteinvik venta på oss i 45 minutt før han kunne starte turen vidare frå Gardermoen.

I samband med opninga av Kvivsvegen var vi, saman med 11 kor og 300 songarar frå Nordfjord og Søre Sunnmøre, med på konsertar i Honndalshallen og Volda kyrkje i september.

Til visematineen vår «Folk i Husan» på Fredheim i april 2013 allierte vi oss både med Dagfinn O. Bye som regissør og med musikarane Peter Demirov og Øystein Djupvik.

I april 2014 hadde vi to konsertar med krigshistorikar Ragnar Ulstein på Fredheim. Det vart ei fin og mektig oppleving både for kor og publikum, der programmet veksla mellom korsong, og hans levande skildring av livet i Kompani Linge og dei åra frå han flykta i 1940 og til han kom tilbake 17. mai 1945. Seinare framførde vi same programmet i Herøy kyrkje.

I september 2015 var vi saman med Sunnmøre Kr. Mannskor, Sunnmøre Festivalkor, Moljegapet Blandakor og Bigset Blandakor og hadde konsertar i Ålesund Kirke, Volda kyrkje og Ulstein Kyrkje. Grunnen var at vår felles dirigent Svein Eiksund fylte 70 år i september. Ei gledeleg overrasking, og ein verdig avslutning på konserten i Ulstein Kyrkje, var det då ordførar Jan Berset kom fram og overrekte Kongens Fortjenstmedalje til 70 års jubilanten.

Alvorleg sjuk og hyllings-konsert

Det var trist for alle at Svein vart alvorleg sjuk berre ei veke etter konsertane, men heldigvis for oss fekk vi Einfrid Grindheim som dirigent i 2016, og ho fortsette det gode arbeidet fram i mot Prøysenkabareten vår «No ligg steinrøysa solvarm…» som vi framførde på Sjøborg med fullt hus sist i oktober. Gode medhjelparar var Dagfinn O. Bye, Peter Demirov og Kåre Jørve.

Etter årsskiftet kom Svein tilbake som dirigent for koret, og i mars 2017 var vi med på ein hyllingskonsert til kreftavdelingane ved Volda Sjukehus og St. Olav i Trondheim.

I juni reiste vi til Bordeaux i Frankrike der vi besøkte koret «Intermittence.» Det vart nokre hektiske, men kjekke dagar med konsertar og fine utflukter. Turen vart arrangert av vår eiga Turid Bakken, som hadde hatt kontakt med medlemer i koret heilt sidan vi var der i 2006.

Før ferien gav Svein oss den triste meldinga at han måtte til med fleire cellegiftkurar. Heldigvis for koret sa Einfrid Grindheim ja til å gå på ein ny sesong i lag med oss, og frå hausten starta vi arbeidet fram imot 40 års jubileet vårt 12.09.18.

I januar 2018 var vi med på Elvis Gospel Tour i Ulstein kyrkje. Det vart ei spesiell oppgåve for oss, men kjekt var det, og kyrkja var langt på veg fullsett denne onsdagskvelden.

Først i juni var vi på songarstemne med Brandalskoret.

Stor takk til Svein Eiksund

Siste laurdag i oktober skal vi ha jubileumskonsert på Sjøborg. Svein har hatt sjukepermisjon sidan i haust, og musikalsk leiar dette året har vore Einfrid Grindheim. No nærmar tida seg då vi vil takke henne for det store og gode arbeidet ho har lagt ned både med Prøysenkabareten i 2016 og dette året med arbeid fram mot jubileet. Ein dyktig instruktør og dirigent som vi alle har sett stor pris på å få samarbeide med.

Det er likevel Svein som fortener den største takka for at koret er der vi er i dag. Med godt humør og stort tolmod har han vore musikalsk leiar i 36 år, og med han som dirigent har vi hatt mange store og gode opplevingar i desse åra. No ser vi fram til å få feire koret sitt 40 års jubileum i lag med han.

Styret i jubileumsåret er slik: Arvid Myklebust, Berit Gjerdsbakk, Tore Øvrebø, Bjørg Marit Moldskred og Per Roar Havåg.

Tilbakeblikk

Som avslutning på dette tilbakeblikket trur eg vi kan konkludere med at vi har hatt 40 gode og gjevande år i koret. Vi er glade i kvarandre og samhaldet er godt. I løpet av desse åra har vi ikkje hatt store problem innad i koret, og samarbeidet mellom medlemane og mot dirigenten har vore godt. Enkeltmedlemer har hatt vanskar i livet, og dei har opplevd at koret var der for hjelp og støtte. Vi har sunge i bryllaup til medlemer, vi har sunge i medlemers 70, 80 og 90 års dagar, og i løpet av desse åra har vi sunge i gravferder for medlemer. Mange har vore innom koret, og mange har slutta. Ikkje alle har vi klart å ta vare på slik at dei har funne seg til rette. Det trur eg er slikt vi må rekne med i eit så lite og tett miljø, der folk med ulik bakgrunn og ulike interesser skal smelte saman og drage i lag. I jubileumsåret har vi 31 medlemer, og 5 av desse har vore med frå starten. Det er Unni Teigene Ulstein, Arne Olav Gundersen, Jarle Myklebust, Arvid Myklebust og dirigent Svein Eiksund. Frammøtet til øving kvar måndag er godt, og vi ser framover mot jubileet med godt humør.