Bildet på budaveggen

Prestegarden vart selt med halvparten til Knut Eliasson Kleiven i 1906, og når han selde vidare heldt han att tomt til kårstove, bygde huset som Ivar Roald seinare kjøpte. Huset er godt synleg på bildet mellom løa og dei andre gardshusa i prestegarden. Den andre halvparten kjøpte Andrias Garnes og Elias W. Garshol, og delte den halvparten likt. Knut Kleiven selde sin del til Hans Strand i 1914, som stod som eigar i tre år og selde vidare til Salomon Dimmen i 1917.

I skogen midt på bildet skimtar vi bustadhuset på «Knutbruket», der dottera Georga Dimmen budde med borna Karl, Klaus og Henny.

Til venstre «Lisje-løda» og til høgre huset som Johannes Larsson Haddal fekk bygd i bytet mellom bruka, som kårbolig når han delte garden mellom sønene Johan b.nr. 1 og Knut b.nr. 8. i 1894, og som Henny og Leif Breivik kjøpte frå Bernt og Knut Johannesson Sundgot i 1948 og bygde på huset.

Skuleplassen var ferdig før krigen, men på grunn av materialmangel vart bygging av ny skule stoppa. Murane var påbegynt, men i ventetida vart byggetegningane endra og bygget vart nesten to meter smalare, nokeosom førde til at der var ei sjakt bak bygget med rist over, som mange vil hugse. Denne skulen vart bygd av Vilhelm Ringstad sine arbeidsfolk og teken i bruk i 1952/53.

På haugen i venstre billedkant kan ein sjå murane etter første bygget til butikken i bygda. Det var Knut og Emma Sundgot som eigde huset. Når butikken flytta til Grynvika vart dette huset brukt som bustadhus ei tid. Jonas Røren kjøpte huset og budde her med familia medan han bygde sitt nye hus på Kvianeset. Han reiv dette huset og brukte tømmeret delvis på sitt nye hus 1946.

Midt på bildet ser ein løa på «Knutbruket», rett ved vegkrysset og landemerket «Skaret». Denne løa vart bygd etter deling av garden, den opprinnelege løa var på «Johanbruket».

«Andrias-naustet» på Stilleneset. Det var Andreas Garnes som bygde og brukte dette naustet.

På «Budaneset» bygde Knut Sundgot sjøbud og kai som Straumane handelslag seinare overtok og brukte til mottak av mjøl og andre handelsvarer.

Den store båten er Straumingen, ved kaia ligg truleg «Rival» som var eigd og drifta av Johannes Skeide (Pike) og som Lars Sundgot (Lisje Lars) disponerte og periodevis drifta. Den minste båten til høgre i bildet er «Max» som vart brukt til å transportere arbeidarar frå bygda til sildoljefabrikken på Eggesbønes. Det var Rolf Sundgot som brukte denne båten og hadde med fleire frå bygda som reiste denne turen kvar dag i sesongane.

Her ser vi gamlebrua som vart bygd i 1875-1876 og nye brua som var ferdig i 1953-1954. Gamlebrua vart fjerna like etter. På dette bildet som truleg er teke i 1954 ser vi at nyaste delen av gamleskulen er borte, den vart demontert og delvis brukt som bustadhus i Gjerdsbakkane. Den eldste delen vart demontert og brukt som verkstad ute i Tua. Dette var tømmerhus, og det var Aksel Johansen og Ivar Roald som stod for arbeidet med flyttinga.

Sundgot bedehus vart bygd i 1901-1903 – og tente som einaste samlingshuset i bygda i 90 år til Hasund bygdahus vart bygd saman med ny skule 1994.

Bildet viser også at vegen frå nyebrua og forbi Straumane er retta ut, men det viktigaste var nok at den vart heva ganske mykje. Det var stadig eit problem at sjøen gjekk over vegen når det var flo sjø.

Husa til høgre vart bygd av Knut Johanson Sundgot og Rolf Sundgot. Knut Sundgot fekk skjøte i 1946, men det var umuleg å få tak i byggematerial rett etter krigen så byggearbeidet tok tid. Huset vart imidlertid innflytta til jula 1951.

Straumane Handelslag fekk i 1936 skøyte frå Knut J. Sundgot og bygde seg forretningsbygg i «Grynvikja». Vika her fekk nok namnet sitt på grunn av djupna. Mesteparten fall tørt ved fjøre sjø. Som bildet viser var det dårleg med parkering. På bildet er det heller ikkje tilbygd fryseri, det vart bygd på siste delen av 1950-åra. Handelslaget vart oppløyst i 1970 og Peter E. Hasund overtok. Etter det starta ei gradvis utfylling av Grynvikja, både for å skaffe meir parkeringsplass, men også for å skaffe utbyggingsareal, og bygget mangedobla arealet i løpet nokre år. Men veggane på næraste hjørnet står framleis skjult av ny fasadekledning, loftet vart fjerna ved utbygginga. Parkeringsplassen dekker det meste av det som før var sjø og fjøregrunn i Grynvikja. Den fungerer no også som parkering for Hasund skule og for Bygdahuset.

I venstre billedkant Grasneset og Grasnesholmen. I høgre bildekant ser vi brenneriet der reiarlaga for Bjørnulf og Straumingen samarbeidde om tranproduksjon, der var drift fram til krigen. Området rundt brenneriet vart kalla «Åburen»

Neste bygget bortover langs fjøra var Straumings-buda som vart flytta frå Vattøya – til og med grunnmurane vart flytta derifrå i 1916. Vidare bortover ser vi Hasund Smie og sveiseverkstad der ishavsskuta ved kaia truleg er Fangstmann, og bakerst i denne klynga ser vi Bjørnulf-buda som seinare vart overteken av Solstrand Trelasthandel.

I fjøra ved Sandbakkane ser vi nothenget og naustet til Hasund notlag. Hasund åttringlag hadde naust i Trollenesstranda i øvre bildekant. Det var truleg denne åttringen som forliste på Svinøyhavet i 1858 der Knut Osnes Hasund omkom, og som Syvert Myklebust fann etter forliset og kom tilbake til Hasund med. Han slo seg ned først som dreng for å hjelpe enka. Gifta seg seinare med enka Ingeborg og fekk mange etterkomarar.

Takk til Kjell Arne Sundgot og Elias Garshol for viktig info om detaljane i bildet. Kjelder elles er Bygdebok for Ulstein og Hareid bind IV og Levd liv 2015 og fleire, som har meir utfyllande info. Som medlem i Ulstein historielag kan du gå inn på nettsida og skrive inn søkeord som «Hadarøy», «Straumane handelslag» og andre tema for meir info om det ein er interessert i.