I år er det 20. utgåva av Levd liv. Ulstein Historielag vart stifta i 1947. Men laget arbeidde tungt ei tid. I 2003 valde laget Aksel Hauge til leiar.
– Noko av det første eg tok opp som leiar, var idéen om eit årsskrift. Men laget hadde ikkje ressursar til det. Derfor leitte vi etter samarbeidspartnarar, og det vart etter kvart naturleg å ta kontakt med Einar Grimstad, som dreiv Idéromet Forlag i fritida, fortel Hauge.
Ei stund seinare fekk Hauge telefon frå Grimstad, som ville vite om historielaget framleis var interessert i eit samarbeid om eit årsskrift.
– Eg sa ja på flygande flekken. Einar kom med forslag om namnet Levd liv, og vi var samde om at det var eit godt og dekkande namn, seier Hauge. Samtidig vart det bestemt at årsskriftet skulle vere ei utgåve med stive permar. Historielaget sitt mål med Levd liv var å knyte banda bakover og slik vere med på å skape større interesse og kunnskap om den lokale historia.
Første boka skulle vere klar til farsdag i november. Dette har historielaget gjort til ein tradisjon, og dermed kan boka fungere som farsdagsgåve eller julegåve alt ettersom.
