Ein vital hundreåring

Hødd vart skipa fredag 1.august 1919, og 25 menn skreiv under protokollen. Sverre Sundgot var den første formannen i historia til klubben. Den første tida vart det spelt fotball på marka til Benjamin Osnes med hesjastaurar som målstenger. På det meste var bana 60 meter lang og 45 meter brei.
Namnet Hødd var eitt av to namneforslag. Det andre var Ulstein Fotballklubb. Frå 1925 vart det bestemt at Hødd også skulle drive med friidrett, og dermed vart namnet Idrættslaget Hødd.

Men Hødd måtte og ville ha si eiga bane. Saka var første gong oppe på eit medlemsøte 25.september 1919. Mange ville kjøpe grunn i Holsekerdalen, men fleirtalet enda opp med å kjøpe grunn hos Martinus Molvær på Støylane. Anleggsarbeidet skaut fart i 1921, og snart var grusbana opparbeidd ved hjelp av dugnad.

I jubileumsåret 2019 for Hødd har Arne Flatin skrive fortellinga om 100-åringen. Levd liv har valt ut cup-kampen mellom Hødd og Vålerengen i 1981 som fortel ein liten del av historia om Hødd. Men før vi går til denne augustdagen i 1981, la oss minne om den største kampen av alle.

Før siste serierunde i 2.divisjon i 1965, søndag 10. oktober, var det ingen som trudde at Hødd skulle rykke opp i 1. divisjon og ta førsteplassen. Rosenborg hadde to poeng meir og betre målforskjell. Men Hødd klarte det umoglege i den avgjerande kampen mot trondheimslaget Kvik, og skora nøyaktig like mange mål som måtte til for å gå forbi Rosenborg. Hødd laga fire mål på sju minutt, og til slutt blei det 8-2. Heilt utruleg! Når så Rosenborg tapte for Brann i Bergen med 2-1, gjekk Hødd opp i 1. divisjon.

Hødd hadde året før spela i 3. divisjon, og det var ikkje mange som trudde det var mogleg at laget kunne ta eit nytt opprykk. Men laget hadde heile sesongen kjempa i toppen med offensiv og god fotball. Det var såleis eit målskapande lag som gjekk på bana denne oktoberdagen i 1965.

Kjetil Hasund og Jan Ulfstein skora begge tre mål kvar, og Magne Fylling to mål. Jan var i militæret dette året og hadde ikkje hatt like gode treningstilhøve som dei andre, men fekk spele begge omgangane. Det viste seg å vere eit klokt val, og Jan blei ein nøkkelmann i bragden på Lerkendal. Magne Fylling berømma Jan for fin-fin målteft og for å vere svært roleg i dei avgjerande augneblinkane. Jan døydde i februar 2019.

Dagen etter kampen reiste Høddspelarane heim til Sunnmøre og Ulstein. Allereie på Vigra blei dei møtt med folk som ville hylle heltane. Og når spelarane nådde fram til haldeplassen i Ulsteinvik sentrum vart dei hylla av omkring 1000-1500 menneske som hadde møtt fram for å sjå høddspelarane.

Kampen mot Kvik og opprykket til 1. divisjon blei starten på eit fotballeventyr av dei sjeldne i norsk fotballhistorie. Hødd blei kalla ”laget frå havgapet” som laga ”fotballspelarar av gråstein”. Framleis har Hødd eit godt namn blant fotballpublikumet – det er askeladden som vann prinsessa og halve kongeriket. Og ein verdig 100-åring.