Ulstein herad er den sørvestre holva av øya Hareidland på Sunnmøre, dessutan Dimna og nokre mindre øyar som ligg nær inntil Hareidland. Heradet er 88,83 km2 og folketalet er 2945 etter teljinga i 1950.

Midstaden i heradet er Ulsteinvik med 1500 innbuarar. Der er d/s stoppestad, telefonsentral, postopneri, apotek, dokter, tannlækjar og fleire spesialforretningar som urmakar, røyrleggar og elles større og mindre forretningar og verkstader av ymse slag.

Næraste byen er Ålesund som ligg ca. 30 km frå Ulsteinvik. Lettaste tilkomsten til den er ved bussruter til Hareid og båt derfrå til Ålesund dagleg.

Ulstein herad er hovudsokna i Ulstein prestegjeld med Hareid som anneks.

I Ulstein er 413 bruk med jordbruksvidd, men av det har 196 bruk mindre enn 10 dekar innmark. Her vert drive eit heller allsidigt gardsbruk med åker og eng, men feal med mjølkesal er likevel det som gjev største innkoma. Heradet er eit kystherad med lite skog, ca, 4.000 dekar. I den siste tida har skogen auka synbert. Mange stader som før var lyngkledde bergsider, er no tilvakse med fin bjørkeskog. Det syner at skogen trivst berre han får fred for beitedyra. Nåleskogen er berre planta skog. Alt i 1870-åra tok ein framtøk mann til å planta skog. Den treivst og gav eit godt føredøme. I 1880-åra vart eit større felt tilplanta i utmarka på prestegarden. Sidan har mange fredskogfelt kome til. Sume av dei står fint.

Attåt jordbruk og det som heng saman med det, har fiskeri frå gamal tid vore ei svært viktig støttenæring, særleg for jordbruket. Dette har snutt seg noko i den seinare tid, meddi jordbruket har fått andre støttenæringar som reveal, småindustri og arbeid ved større bedrifter mellom onnene, medan fiskarnæringa har meir og meir vorte ei sjølvstendig næring som vanleg vert driva året rundt i dei ymse sesongar.

Årsaka til dette er at båtane som no vert brukte til fiske er store moderne havgåande båtar som må drivast heile året og på mange fangstfelt skal drifta løne seg. For ca. 30 år sidan fekk heradet elektrisk kraft. Sidan har industri av ymse slag vakse opp og har gjeve levebrød til mange huslyder.