Når ein no etterkvart kan ta i bruk Eiksundbrua og kome seg tørrskodd over til Eika, vil nok mange ta spaserturen dit.
Folkevandringane har vore frå fjordane og utover, nærare og nærare fisken. Slik har det vore i Eiksund og slik har det vore på Elika. Unntaket er Sunde 1 som fekk brukarar frå Ulsteinstranda og Flø. Sundevågen og Klungsvågen er gode båthamner. Til Klungsvågen kom dekksbåtar m.a. frå Vartdal for å ligge trygt mellom fiskjene. Langevågen, som går inn ved Geitholmen, er dei siste åra ei mykje nytta overnattingshamn for fritidsbåtar.
Gardane som vender mot Eiksund ber gardsnamnet Sunde. Gardane som vender mot Yksnøya og fjorden har gardsnamnet Eiken. Eg brukar her Eiken for ikkje å blande saman gardsnamnet med øynamnet. Gardane Eiken har kort veg til Yksnøyhamna.
I 2006 bur tre personar meir eller mindre fast på Eika. Å ta ein tur hit er som ei reise attende i mellomkrigstida. Både tuna og skulen er der. Skulen hadde frå 1932 til 1937 23, 24, 26, 25, 23 og 21 elevar. Men så byrja nedgangen. Frå 1952 heldt undervisninga til i den gule stova på Eiken 3. Då var elevane frå Yksnøya óg med. I 1952 var der fem frå Eika og to frå Yksnøya. I 1953 var der 3 frå kvar av øyane. I 1954 hadde talet gått ned til 4 – to frå kvar av øyane. Så var skulehistoria slutt for Eika sin del.
Omgangsskule
Ein kan bruke 1874 som døme frå omgangsskuletida. Då gjekk borna frå Eika i lag med Eiksund-borna. Dei heldt til i Eiksund første tur frå januar til april, på Eika andre tur i mai og juni, så tredje tur frå juli til september i Eiksund. Resten av året heldt dei til på Øggarden.
Elevtalet for Eika og Eiksund var 31.
Skulehuset/Forsamlingshuset
Skulehuset vart bygt som forsamlingshus i 1914. Dette var for øvrig to år før Eiksund fekk sitt. I 1930 vart det vigsla til skule. Første to åra hadde ein samla skule og lærar saman med Eiksund. Frå 1932 vart skulen todelt med eigen lærar og eigen protokoll.
