Året 1858 skulle bli eit skrekkens år for eigarane av Johangarden, Bnr 4 på Hasund. Husbonden Knut J. Osnes Hasund, 26 år, var på fiske med båtlaget sitt. På Svinøyhavet bles det opp til storm. Folk frå Gursken leitte etter mannskapet, men fann ingen.
Dei tok båten på slep til Hasund. Den 27 år gamle Sivert Myklebust var ein av dei som gjekk til gards med bod om båtfunnet og tragedien, med den grusomme meldinga at alle på båtlaget til Knut var omkomne.
Enkja Ingeborg sat att med 3 born, Johan, Peter og Hans i alderen 6, 4 og 1 år.
Sivert tykte synd på enkja og vart verande på garden, i første omgang som dreng. Etter eitt år gifta Ingeborg og Sivert seg. Ein ny familie var stifta og etter 14 år var barneflokken auka frå 3 til 9:
Knut Adolf – døydde 21 år gamal i Oslo der han gjekk i gravørlære.
Lina (Oline) – vart gift med Andreas Karlson Bjåstad. Dei fekk 7 born. Budde i Ålesund til bybrannen i 1904. Dei flytta då til Hareid og overtok farsgarden på Bjåstad, bnr. 5. Lina gjekk på Statens håndverks- og kunstindustriskole i Oslo. (*)
Serine Matea – vart 11 år.
Sigvald – vart gift 1894 med Johanne Margrete Hagerup Raanes frå Værøy og fekk 6 born. Meir om han i eige stykke. Gift 1931 med Signe Johanne Hansen f. Ruud.
Enok Simon – vart gift med Kristine Rødset frå Volda. Dei fekk 6 born. Han overtok i 1910 bruket Sandvika i Hasund og var lærar i Volda før han i 1902 byrja ved Hasund krins. Enok gjorde mykje for song- og musikklivet i Ulstein og var med å skipe «Ulf» i 1893 der han var dirigent i nokre år. Han starta songkor og hornmusikklag i Hasund.
Serine Josefina – døydde 19 år gamal.
(*) Då eg i 2000 på telefon samla inn persondata til Personboka 2000, spurde ei dame frå Strandabø/ Hasund meg: «.. så du er barnebarnet til Lina Hasund? Veit du at ho var den første på Hareidlandet som gifte seg i kvit kjole og kvite skor?» Eg måtte svare som sant var: Nei det visste eg ikkje. Truleg var dette Nyfrid Gardshol Tollefsen. Døydde i 2020, nær 101 år.
