Har digitalisert 2.500 sider med Ulf-historie

Eiken har lang erfaring innan Musikklaget Ulf. Bortsett frå korte avbrot har han dirigert korpset frå 1976, då han tok over etter Toralf Gjerde, og fram til 1991. Terje kom med i Ulf som 13-åring i 1959. Han la ned eit betydeleg arbeid i musikklivet i Ulstein, ikkje berre i Ulf, men også som dirigent og instruktør for Skulekorpset, Storbandet og på mange andre område.

Terje Eiken har vore dirigent og instruktør i ei rekke korps på Sunnmøre. Han var leiar i Sunnmøre Hornmusikk i seks år og styremedlem i ytterlegare fem. Han har vore leiar i Møre og Romsdal krets av NMF i seks år, og vore styremedlem og hatt ulike andre verv i mange år. Han har mellom anna vore administrativ leiar av NMF-sommarskulen i 10, og vore nestleiar i NMF-region vest i to år. Terje var leiar i plannemnda for Ulstein kulturskule, leiar i kulturskuleutvalet og rektor der i ein overgangsperiode. Som medlem av Ulstein konsertlag har han vore arrangør for Rikskonsertane i 10 år.

Dei trykte hefta om Musikklaget Ulf er eit sett gitt til biblioteket, eitt til Ulstein Historielag og eitt vil Eiken behalde sjølv. Resten er gitt til Musikklaget. Sparebank1 Søre Sunnmøre har dekt utgiftene til trykkinga. Terje Eiken har sjølv gjort sin del av arbeidet vederlagsfritt.

Terje Eiken har med dette heftet gjort eit stort og viktig arbeid for å ta vare på historia og fortellinga om Ulsteinsamfunnet.

I år er Musikklaget Ulf 130 år. Vi har gjort eit lite utval frå heftet frå den første tid, og tilpassa tekstene til dagens språk.

Musikklaget Ulf vart skipa den 16. mars i 1893. I år er Musikklaget 130 år. Musikklaget «Ulv», som namnet var i byrjinga, var knytta til Ynglingeforeningen, det som seinare vart Ulstein kristelege ungdomsforeining og ein del av KFUK-KFUM. I mange år hadde Ulf øvingane sine på Fredheim.

Allereie i 1894 tilbaud Ulf å spele under høgmessa i kyrkja 1. juledag, men då vart det stor oppstandelse mellom dei mest konservative i kyrkjelyden. «I år spelar dei i kyrkja, neste år skal dei vel danse», vart det sagt. Men dei fekk til slutt spele frå kyrkjetårnet, men måtte love å vere ferdige i god tid før kyrkjelyden kom.

Seinare vart Musikklaget Ulf eit fast innslag i kyrkja juledag, og spelte til salmane fram til kyrkja fekk eige orgel. Tradisjonen vart teken opp att noko seinare, og i mange år var Musikklaget Ulf med på høgmessa første juledag.

Den første protokollen som Terje Eiken har funne er mest truleg frå 1920. I denne protokollen er det kun ført opp ei medlemsliste. Om lista skriv Eiken: Det er vanskeleg å tyde skrifta, då ho er utydeleg og svak. Særleg vanskeleg var det å tyde mellombokstaven etter fornamnet. Her er namna på dei 24 medlemmane i 1920:

Olav Welde (dirigent), Hans J. Saunes (bytte etternamn frå Osnes), Leif H. Saunes, Peter C. Garshol, Knut C. Garshol, Johs. H. Saunes, Arthur A. Saunes, Carsten Ottesen, Johs. N. Osnes, Nils J. Osnes, Ragnvald R. Ulfstein, Sverre Svendsen, Ole S. Hofseth, Elias J. Osnes, Johs. E. Osnes, Olav P. Saunes, Johs. A. Saunes, Fridtjof Hofseth, Ivar Bjørnerem, Hans K. Osnes, Karl Alme, Torvald Bjørndal, Nils A. Flø og Enok Hofseth.

Av medlemslista les vi fleire menn som hadde eller fekk stor betydning for Ulsteinsamfunnet.

Frå starten i 1893 var desse med: Hans B. Osnes (tuba), Enok S. Hasund (Ess-kornett), Knut C. Garshol (B-kornett), Ole P. Flø (B-kornett), Hans J. Saunes (althorn) og Rasmus Garshol (tenorhorn). Eit års tid seinare kom desse til: Hans A. Saunes (Ess-klarinett), Johan R. Osnes (B-klarinett), Lauritz Dimnestøl (fløyte), Nils J. Osnes (Ess-kornett) og Ole Bakke (fløyte).

Vi merkar oss at Enok S. Hasund står på medlemslista både i 1893 og i 1920. I boka Hundre år og hundre personar skriv Asle Geir Widnes Johansen blant anna dette om Enok:

Enok Hasund er mest kjend for det store arbeidet han la ned i song- og musikklivet i Ulstein. Enok vart fødd i Johangarden i Hasund. Ein stor del av ungdommane frå Strandabøen og innover til Botnen var medlemmar i Ulfsteins Ynglingeforening. Då Musikklaget Ulf vart starta i 1893, var Enok med frå første dag. Han var ein av dei som ytte lån til kjøp av instrument. Han var dirigent i til saman 17 år. I 1951 fekk han Kongens fortenestemedalje for det store kulturarbeidet sitt.

Av denne gjekk det fram at laget i 1923 hadde vore saman og spela 78 gongar. 2 konsertar, 5 gongar i kyrkja, 8 festar, 2 gongar i paviljongen, 1 gong i Aalesund, 1 sylvbrudlaup, 1 brudlaup, 3 basarar. 55 øvingar. Der er i aaret vore kjøpt instrument, 1 B-klarinett og 1 Ess-klarinett.

Årsfest 11. februar1923 på Fredheim

11. februar 1923 hadde Musikklaget Ulf årsfest på Fredheim. Om lag 70 menneske var til stades. Festen vart opna av festnemnda sin formann Hans K. Osnes, som på ein lun måte baud festlyden velkomen. Så spela musikken.

Lærar Hasund kom så på talarstolen og heldt ein fin tale om den rette klangbotnen som ein måtte arbeide seg fram til. Den djupe talen greip alle og vart vel teken i mot. Så musikk igjen.

Så var det matservering.

Så kom nokre gamle mannskor-songarar fram og song eit par songnummer. Fru doktor Støren spela på piano. Lærar Martin Bjørndal las eit dikt: Svein Dreva.

Musikk igjen.

Peter Bøe kom så fram og takka for seg og sine, sa at han var ikkje blind for kva arbeid som var nedlagt i dette musikklaget, ville berre ynskje lukke til i arbeidet framover. Sigvald Hofseth takka for dei innbedne.

Så var det igjen matservering.

Musikk igjen.

Lærar Hasund tala no tilslutt (fortsettelse frå første talen) og sa til slutt at han gjekk frå festen eit «ljost minne rikare».

Musikken spela no til slutt «Nu takker alle Gud», og den fine festen var slutt.

Musikkpaviljong vigsla 17. mai 1921

Den 19. april 1921 vart det samrøystes vedteke å sende ein søknad til Ulsteinvik skulekrins om å få løyve til å bygge ein Musikkpaviljong på krinsen si skuletomt i Ulsteinvik.

Den 22. april 1921 vart det samrøystes vedteke å ta imot Ulsteinvik skulekrins sitt tilbod og betingelsar for å få bygge Musikkpaviljongen på krinsen si tomt. Det vart og samrøystes vedteke at me skal søke om råd å få Paviljongen ferdig til bruk til 17. mai. Til byggjenemnd vart samrøystes vald Olav Welde, Olav P. Saunes, Ole S. Hofseth, Nils J. Osnes, Knut C. Garshol og Hans K. Osnes.

17. mai 1921 vart paviljongen til Musikklaget Ulf vigsla. Lærar Bjørndal heldt vigsel-talen der han med varme ord minna om den store makt der ligg i god song og musikk. Han minna og om det store arbeid som er nedlagt frå dei som er med i musikklaget og bad møtelyden og bygdefolket om å forstå dette både i ord, og gjerning. Talaren ynskte til slutt at også dette tiltak måtte verke til det gode og høgne livsidealet både hjå dei som no lever og dei som kjem etter.

Kommentar: Under artikkelen “Eit foto fortel” er det mogleg å sjå musikkpaviljongen.